Da ka jingpynïasoh jong ki laingut ki snar ka Congress party sha ka ka NPP ha ka Lah sngi u Blei 10.08.2024, kata; u Bah Charles Marngar, Gabriel Wahlang & Dr Celestine Lyngdoh ba la tip da ka kyrteng sin kum u Dr Bom, ka jingangnud jong u Conrad Kongkal Sangma ban pynïar ïa u tnum u thyndai ka party jong u hapoh Assembly ka la urlong da ka jingkiew ka jingbunpaid na ka 26 + 2 (PDF) + 3 (Congress) sha ka 31 ngut na ka 59 ngut ki dkhot,ha kaba 5 ngut kim donkam ban ïaleh election kyrpang.
Shisha, ka kyntien ki riewstad ba ‘ym don permanent friend ne permanent enemy’ ha ka politics te ka la dei shisha. Mano ba lah ban mutdur kum u Dr Bom un dangleit ban pynïasoh ïalade sha ka NPP, namar u la lah ban ïaishah wat ha ka jingwan lynshop jong ka Umsaw ïa ka party jong u hadien ka jingphet seng jong u Dr Mukul sangma bad kiwei pat ha ka snem 2021.
Kata ka jingïaineh jong u ka wanrah ïa ka jingshaniah wat na ka high command jong ka party na Delhi hynrei ka kut noh tang shiphang por. Nga tharai ba ki paidbah ka jylla ki dang kynmaw dngong ba katei ka kyntien ‘High Level’ kam dei satia kaba u nongthoh u tam na surok ne na Myrten hynrei dei na ki kyntien jong u Dr Bom hi ha ka jingkren jong u ha ka sien shong Dorbar ba nyngkong eh jong kane ka Pali (2023-2028) ha ka snem 2023. Ha katei ka jingïashim bynta, u Dr Bom u ong ba u sngewlyngngoh ba ha Meghalaya la mih sa kawei pat ka ‘Tribe’ nalor kiba la don lypa bad kata ka dei ka ‘High Level Tribe’ haba u thew pharshi ïa ka jingleh donbor jong ki briew kiba don ha ka sorkar MDA 0.1 bad 0.2 kumjuh. La u Speaker u la expunge (weng) ne ka dangdon ha ka record jong ka Assembly ngim tip, hynrei ha ka history jong ka Meghalaya te la ka sah junom.
Kane ka jingkyntiap seng ne jingryngkang diengkper jong kawei ka party sha kawei pat kam dei shuh kaba dang thymmai ha Meghalaya, namar ha ki por ba mynshwa ba danglong Speaker u Bah Patty Ripple Kyndiah ruh ka jia, ha kaba u la suspend ïa ka voting rights jong 5 ngut ki MLA shwa ka No Confidentce motion ha ka snem 1990 tang na I shilaiñ I jingujor u Bah HS Shylla bad pynduh syndon ïa ka jinglong dkhot jong ki na ka Assembly; ha kaba u Ma HB Dan, ka Miriam D Shira bad kiwei, ki don ha ka jingkyntiap seng kat haduh ba ka jingïaleh ka la poi wat shaduh Supreme Court, ba la ïasaid da u Shanti Bushan u nongsaid aiñ bapaw.
Ha ka jingshisha, hadien ka jingsdang sniewdur jong ka Indian Democracy, ka sorkar India ba la lamkhmat da ka Congress ka la passed ïa ka Anti-Defection Law ne Aiñ pyrshah Kyntiap Seng da kata ka Tenth Schedule ba la bynrap ha ka 52nd Amendment jong ka Indian Constitution. La passed ïa ka ha ka snem 1985 ban khanglad ïa ki seng saiñ hima ban kyntiap seng. Kaba kongsan eh ka long ban khanglad ïa ki nongmihkhmat MLA ne MP ba la shah jied na kawei ka party ban ryngkang sha kawei pat ka party. Ka jingmut ka long ban wanrah ïa ka sorkar kaba neh bad baskhem. Hynrei kane ka Aiñ kam lah ban khanglad pura ïa ki nongmihkhmat, dei namarkata ka daw, ka la pyllong pynban ïa ka democracy jong ngi ban shah rkhiebeiñ (mockery of democracy) wat hadien 39 snem naduh ba la thaw ïa ka.
Kum ka nuksa, ym don kawei ruh ka party ba ïoh majority ha Karnataka ha ka snem 2018. U B.S. Yediruppa BJP u la long Chief Minister tang 3 sngi bad u hap ban resign noh namar bym biang paid. Hadien kata, u HD Kumaraswamy Janata Dal (United) u ïasynrop lang bad ka Congress bad u la long Chief Minister 13 bnai. Utei u lok ruh u hap ban resign namar ka jingkyntiap seng bad iehnohkam ki MLA jong u. Kumjuh ruh ha Maharashtra ha ka snem 2019, u Devenda Fadnavis BJP u la long Chief Minister tang 3 sngi hi, namar ba um lah ban ïoh majority ha kaba ka Shiv Sena, ryngkat bad ka NCP bad ka Congress ki la thaw sorkar ba la lamkhmat da u Udhav Thakeray. Hynrei kane ka sorkar ruh ka khyllem noh namar ba ka don ka jingïadie ïathied kulai ha kaba ka BJP da ka jingïatreilang bad u Himata Biswa Sarma, la kit bad setslung ïa ki MLA liang pyrshah ha Hotel Radisson Blue, Guwahati. Ban lait na ka jingshahweng dkhot, kat kum ka Clause 4 sub-para (2) jong ka Tenth Schedule, kano kano ka political party kaba kwah ban pynïasoh bad kawei pat, ka dei ban don 2/3 (ar na la lai bynta) na ka jingdon ki dkhot, lane kat kum ka Clause 5 (a) u nongmihkhmat u lah ban resign noh shwa na ka political party ba pynjop ïa u bad ban wad biang ïa ka jingshaniah jong ki paidbah ha ka election babud da kata ka party thymmai ba u kwah ban ïasoh.
Hynrei, wat hapdeng kine ki jingtlot jong kane ka Aiñ, ka don ka jingpyrshang ban pynkhlaiñ ïa ki bniat jong ka haduh mynta. Ha ka jingshisha, la sdang pun ïa kane ka aiñ naduh ka snem 1968 da ka Y.B. Chavan Committee lyngba ka resolution ba la passed da ka Lok sabha, wat hapdeng ka note of dissent ba la buh da ka Communist Party of India (CPI).
Hooid, ngi la kham ïaid jngai khyndiat, hynrei to ngin ïaphai biang sha ka jingjia ha Meghalaya ha kine ki khyndiat sngi, hadien ba la mih ka khubor ba ki laingut ki MLA Congress kin kyntiap noh sha ka NPP, u Ma Vincent Pala President ka MPCC ryngkat bad kiwei pat, ki la pyrshang ban khanglad ïa katei ka “Poaching Operation” jong ka NPP hynrei hadien ba ka la summon ïa kitei ki laingut, tang u Dr Bom uba wan ban tep eitmiaw ban phla ba ka don shisha ka jingkhroh jingkjor ïa ki, hynrei u ong ba ïalade um pat rai. Dei namarkata ka daw ba ka AICC ka la rai ban suspend tang ïa Bah Charles Marngar bad Gabriel Wahlang na ka party haduh 6 snem kynthih tad haduh ba la pyntip da kumwei pat. Te balei pyllait ïa utei uwei ruh?.
Shuh shuh kaba kham pynklumar jingmut ïa ki paidbah ka long ba ha state level ym long ban ïatreilang bad ka NPP katba ha KHADC pat long. Ym lah sngewthuh shuh, yn jin da la rai ban ïatreilang bad ka NPP ha ka state level, nga tharai kan nym don ka jingpynpait ïa ka party
Congress. Hynrei kaba lyngngoh eh ka long, kumba la kdew haneng, ha ka politics ym don nongshun baneh larta ym don paralok baneh larta. Wat ngim lah ban tip ha katei ka tactics “Poaching Operation” la ki pyndonkam da ka tyngka pliah ne da kiwei pat ki jait jingthong, hynrei tang kawei kaba ngi tip ba u Dr Bom ryngkat bad kitei ki arngut ki MLA te ki la leit ban ïasoh bad ka ‘High Level Tribe’ kaba u kren pharshi hapoh Ïingdorbar Thawaiñ. Dei hangne ba ka ktien tymmen ka ong “wat pynrem ïa kiwei, ïoh ka kyrtoh shalade”. Hynrei ka jingshisha kaba ngi ïohi ka long, wat la ki nongvote ki la dep ai ïa ka rai ban jied pura, pynban kiba bun ki politician (ym baroh khoit) kim lah ban im khlem da kyntur ban kyrshut ïa ka sharak Alla-uddin ne ha ka shuki sop khleiñ jong ka sorkar. Ha ka jingshisha, uno uno u Minister um dei ban long tang u jong ka Liang synshar ne tang ïa ka Constituency lajong hynrei u dei ïa ka Jylla baroh kawei, te lada ka MLA Scheme ruh ka la kot lypa sha ka 2 Klur tyngka shisnem, sa kiwei pat ki scheme kiba bun na ki department bapher bapher, uba trei hok u la ïoh hi ban pynroi ïa ka Constituency lajong, lada ka sorkar kam leh, “gheroa” ïa ka Assembly da ki paid ka Constituency lajong kat kum ka Riti Synshar Ri.
Lymda ka ai kyntiap seng (Anti-defection Law) ka kdew ba u MLA ne MP u dei ban resign noh shwa shwa ba un kyntiap seng bad ban wad ïa ka fresh mandate (ïakhun election shiteng samoi) biang, te la eh ban teh lakam ïa ka jingleit jingwan jong ki “Ayaa Ram ki Gayaa Ram”.
Khatduh eh, lada ka NPP ka sngew donbor ban thied ne khring ïa kiwei pat ki MLA ban pynbun paid, balei kam pynshisha ba ki paidbah ki shaniah shisha ïa ka, da kaba pynlong noh ïa ka election MDC ha ki District Council ban tip shai kdar?. Hynrei ka jingpynjlan shi pynjlan ka paw ba ka don kaei re kaei kaba sha lyndet.
