Shillong, Rymphang 09: Ka Sorkar Jylla Meghalaya ha ka 09 tarik u Rymphang, 2025 (sngi U Blei), ka la pyntip ba ka jingangnud jong ka Jylla ban ïoh pynlong ïa ka lympung ïalehkai ba hehtam jong ka ri ka ‘Nationals Games’ ha u snem 2027 ka la urlong. ïa kane la pynthikna da u Bah Shakliar Warjri, Myntri ba dei khmih ïa ka tnad Sports and Youth Affairs hadien ba ka Indian Olympic Association (IOA) ka la pdiang ïa ka jingkyrpad jong ka Jylla ban pynlong ïa katei ka lympung ha u snem 2027.
Dang shen ha u Nohprah jong u snem ba ladep, u Bah Shakliar u la ïoh ban ïakynduh bad u Myntri Sorkar India ba dei khmih ïa ka tnad Sports, u Mansukh Mandaviya ha Delhi ha kaba na ka liang jong ka Jylla ha ka jingïalam jong u Myntri Rangbah ka la ai ïa ka shithi na bynta ban pynlong ïa ka National Games ba 39 ha Meghalaya ïa kaba la mynjur da ka IOA.
“Nga dap da ka jingkmen kaba khraw ba mynta ka sngi Ngi la ïoh ïa ka jingpynthikna na ka liang jong ka IOA bad kumjuh ruh na ka liang jong ka Supreme Government ha kaba ki la pdiang ïa ka jingkyrpad ka jong Ngi ban Ngin pynlong ïa ka National Games,” la ong u Bah Shakliar da kaba bynrap ba kane ka long ka khubor kaba wanrah ïa ka jingkyrmen kyrpang eh ïa ka Sports hapoh ka jylla.
“Nga ngeitskhem ba kane ka khubor kan long kaba kmen na bynta ki khun samla kiba ieid ïa ka Sports ha kane ka Jylla ka jong Ngi …bad na ka liang jong ka Sorkar ngin nang trei shitom na ka bynta ki khun samla bad Ngi kyrmen ba ki khun samla kin shim ïa kane ka kabu…kin shim ïa kane ka rynsan ba kin ïai treishitom ïa kaba kin ïoh ban wanrah lane ban khur ïa ki takma ha kane ka National Games ban sa long ha u snem 2027 ha ka jylla ka jong ngi”.
Ha kine ki khyndiat snem ba ladep ka Sorkar Jylla Meghalaya ka la trei borbah ban bei tyngka ha ki jingtei ïa ki jaka ïalehkai, kynthup ïa ka jingpynbha ïa ki Stadium ha Shillong, Jaintia Hills, bad ha Tura, bad ban ïoh pynlong ïa ka National Games kan long ka jingkyrmen ïa ka Sports hapoh ka Jylla.
“Nga ngeit skhem ba kane ka long ka khubor kaba kmen bad kaba wanrah ïa ka jingkyrmen kyrpang eh na bynta ka Sports ha kane ka Jylla ka jong Ngi,” la pynkut u Bah Shakliar.
Ha kajuh ka por u Bah Shakliar u la pynpaw ka jingai khublei ia baroh kiba la wanrah nam rah burom ia ka Jylla Meghalaya da kaba ioh khur takma na ka lympung National ba dang iaid sha khmat ha Jylla Uttarakhand.
Kumban shu kdew hangne, ka 38th National Games ha Uttarakhand kan kut noh ha ka 14 tarik u Rymphang bad la wan ïashimbynta palat 10 hajar ngut ki nongïalehkai, kynthup ïa ki official bad ki coach naki jylla bapher bapher kiba ïakhun na bynta ki takma ha ki 32 tylli ki jait jingïalehkai.
Ha katei ka National Games kaba 38 ha Uttarakhand, ka jylla ka la khur kawei ka takma ksiar lyngba u Vikash Rana ha ka Men’s Kayak Cross Extreme Slalom, ar tylli ki rupa ba la khur da ka Elizabeth Vincent ha ka Women’s Kayak Cross Extreme Slalom bad u Indra Sharma ha ka Men’s Slalom C1 Event bad ar tylli ki takma rnong ba la khur da u Pynshngaiñ Kurbah ha ka Men’s Slalom K1 Event bad kawei la khur da ki shijur ki nongking-lieng jong ka Rowing Association kata ka Kiran Devi bad ka B. Anandhi ha ka Lightweight Women’s Double Sculls.
