Shillong, Rymphang 09: Kum shi bynta ban kham pyntbit bad pynjanai ïa ka sap kyrpang ba ka don ha ka phutbol ka Deiphibakor Lyting, ka heprit ka ba dang 12 snem ka rta ka la pynïasoh ïalade bad ka shlem ai jinghikai jong ka ‘4forall Football Academy’ kaba don ha Diengïong, Mawdiangdiang.
Ka daw kaba la khring bad kaba pynktih ïa kane ka heprit Deiphibakor ban sngewtynad ha ka ban ïalehkai phutboll ka dei naduh ba ka dangrit. Haba ïakren bad kane ka heprit, ka la ïathuh ba naduh dangrit ka sngewtynnat ban peit-thuh ïa ki sap ïalehkai ba ka ju peit ha ki ‘youtube chanel’ ym tang kata hynrei ka da pyrshang pyrthuhbud ruh marwei-marwei ryngkat ki jingiarap ki para shnong.
“Nga dap da ka jingkmen ban ïoh kalad ban lehkai ha Shillong namar ha shnong nga ioh ba ialeh kai tang ha ki madan khyndew kat ba ha Shillong nga ïoh ban ïaleh kai ha ki madan phlang ba jyrngam ka ba dei ruh ha ka sien nyngkong” ka la pynpaw.
Na ka liang jong ka samla Manisha Lyting kaba long ka hymen arkmie jong ka heprit Deiphibakor, ka la ïathuh ba ka Deiphibakor kala sdang ban ïalehkai myllen tang bad la i para arkmie kynthei, hynrei kham hadien ka la sdang ruh ban ïalehkai bad ki para khynnah shynrang kiba ïa ryngkat rta.
“Ka la ïathuh ruh ba ha ka jingshisha ki bor pyniaid jong ka Rangdajied United FC ki la khot ïa kane ka heprit hynrei na ki daw jong ka jingbunkam ki khlem ïoh shuh ban ïa kren kumta ki la poi ban ïakynduh bad u Bah Dawanshan Kharbudon-rai jong kane ka ‘Academy’.
Kumban shu kdew hangne, ka heprit Deiphibakor Lyting ka dei na ka shnong Nohron kaba ha Mawkynrew Constituency, kadei ka khun ba-ar jong ka Kong Phalin Lyting bad ka dang pule ha ka Klas – VII ha Nohron Presbyterian Upper Primary School.
Dei lyngba ki ‘dur khih’ ha ki rynsan social media ba la saphriang ba kane ka khynnah ka la lah ban pynpaw pyrthei ïa ka sap ïalehkai phutbol jong ka.
