Shillong, Rymphang 09: Ki ar kol jong u Ronney Wilson Kharbudon (60’ & 71’ minit) ka la ïarap ïa ka Shillong Lajong FC ban pynliem ïa ka Namdhari FC da 3-2 kol ha ka jingïalehkai kaba itynnad ba la long hala ïing, kata ha madan First Ground – SSA Stadium, Polo, ha ka janmiet jong ka sngi Saitjaiñ (08 tarik u Rymphang, 2025).
Ha kane ka jingïalehkai ba ka Lajong ka la khur ïa ka jingjop, la ïoh ban sakhi ruh ïa ka kol kaba kloi na u Figo Syndai (7’min), kaba la pynkhihwin ïa ka jingïaidlynti kaba 9 sien lynter khlem ka namrem jong ka Namdhari. Wat hapdeng ka jingtrei shitom jong u Francis Nuer Addo (45+2’ & 89’ minit), uba la thep ruh ar tylli ki kol na bynta ka Namdhari, ka Lajong kaba ïakhun hala ïing ka la lah ban kput kylliang ïa ka jingshah rem jong ki da 5-2 kol ha kane kajuh ka liang pyrshah ha ka jingïakhun ba ladep mynta ka samoi.
Shuwa ban jam sha ka jingïalehkai, ka Namdhari FC, kaba bat mynta ïa ka kyrdan ba ar ha ka miej hadien ba shah rem, ka la long ka kynhun kaba don jingkyrmen bha ban khur ïa ka namjop, da kaba rem tang ar sien shuwa kane ka jingïakhun. Ka jingshah rem ba khatduh jong ki ka long pyrshah ïa ka Dempo SC ha ka 03 tarik Nohprah.
Ha kawei pat ka liang, ka Lajong ka la mad ïa ka namrem ha ka Real Kashmir ha ka jingïalehkai ba khatduh jong ka hynrei kam shym la pyni dak eiei ïa ka jingsngew syier. Ki la jam sha kane ka jingïalehkai ban aireng ïa ka Namdhari da ka mynsiem shlur bad da ka jingkut jingmut bad ka jingjop ka la kyntiew ïa ki sha ka kyrdan ba hynriew ha ka miej da kaba kamai 19 poiñ na ki 13 tylli ki jingïalehkai. Katba ka Namdhari ka la duh noh ïa ka kyrdan ba nyngkong ha ka Churchill Brothers bad ka la hiar sha ka kyrdan ba ar ryngkat ki 24 point naki 13 tylli ki jingïalehkai.
Ka jingïalehkai ka la sdang khihwin tang khyndiat minit mar ïa sdang ha kaba ka Lajong ka la ïoh ban lamkhmat ban pynkyndit ïa ka liang pyrshah lyngba ka kol na u Figo Syndai ha ka minit kaba 7 jong ka kylla step. Ka bol pashat kaba thikna na u Damaitphang Lyngdoh ka la shem ïa u Figo Syndai, uba la khyrwit beit jlang sha kol.
Lah ban kdew ba ka Lajong ka la ïoh ban tehlakam bun shah ïa ka bol ha ka kylla step, bad ka jinglah jong ki lai ngut ki rangïalehkai pdeng madan (midfield trio) ba kynthup ïa u Damaitphang Lyngdoh, Figo Syndai, bad u Hardy Cliff Nongbri ka la aibor ïa ka Lajong ban pynpra ïa ki rangapdien jong ka Namdhari da kaba pyndonkam ïa ka rukom pashat bol kaba stetbad kaba thikna.
Wat la ki la thaw katto katne ki lad kiba paka, hynrei ki rangïalehkai ba shakhmat jong ka Lajong kim shym la lah ban pyndonkam bha ïa ka kabu ba ki ïoh, kaba pynsah da tang 1-0 kol. Ki kabu ksiar kiba la jan rung ki kynthup ïa ka bol pashat na u Kenstar Kharsong, kaba u Phrangki Buam um shym la lah ban pynurlong, bad ka jingpyrshang thep kol jong u Douglas Tardin, kaba la shah khanglad noh ha u Jaspreet Singh – rangap kol jong ka Namdhari.
Ka Namdhari ka la hap ban mad ïa ka jingshah ñion kaba jur ha ka kylla ba nyngkong, hynrei ka la ïoh ban pynïakhaid pat ha ka khyllipmat shuwa ban wai shiteng. U Francis Addo u la ïoh ban pyndei tiak da ka khlieh ïa ka bol bala pashat da u Sukhandeep Singh na ka free-kick kaba u rangapkol ka Lajong u khlem shym la lah ban ïada.
Ha ka kylla miet ka Lajong ka la pynkhlaiñ biang ban synshar ïaka jingïalehkai. Ha ka minit kaba 60, u Wilson u la kynthih kham shalor ban shem ïa ka bol pashat naka free kick ban pyndei tiak da ka khlieh kaba la rung lyngba u Jaspreet Singh watla une u nongap kol u la ïoh ban ktah khyndiat ïa ka bol.
Ka Lajong ka la nang pynskhem shuh shuh ïa ka jingïoh lamkhmat jong ka hadien 10 minit lyngba kawei pat ka kol ba la thep da u Wilson, ïa kaba u la thep biang sa shi sien da ka khlieh.
Ka Namdhari FC ka la wanphai biang hadien, ha kaba u Addo u la thep ïa ka kol kaba ar ban pynduna ïa ka jingshah lamkhmat. Hynrei kane ka kol jong une u nong Ghana, ka la wan dier por palat bad kam shym la wanrah jingkylla ha kane ka jingïalehkai.
Da kane ka namjop, ka Lajong mynta kan khmihlynti ïa ka jingïalehkai kaba bud ha la ïing pyrshah ïa ka Sreenidi Deccan FC la sngi Thohdieng, kata ha ka 14 tarik Rymphang, ha ka por 7 baje janmiet ha madan First Ground – SSA Stadium, Polo-Shillong.
