Shillong, Rymphang 09: Ka Sporting Spirit SC kaba na Mawsiatkhnam ka la ïohrah ïa ka namlahduh jong ka Football Tournament ba la pyniaid da ka Umrynjah Sports and Cultural Club, hadien ba ka la lah ban pynliem ïa ka Nongkohlew SC da kawei la nod (1-0) ha ka jingiakhun ia ka final ha madan Umrynjah ha ka sngi Saitjaiñ ka 08 tarik u Rymphang, 2025.
Da kane ka jingjop ka Sporting Spirit SC kum ka Lahduh ka la ioh khung ïa ka song pisa kaba 20,000 tyngka, katba ka Nongkohlew kaba wan baar da 10,000 tyngka.
ïa ki khusnam ha kane ka sngi la sam da u Astorious Lyngdoh kum u kongsan ba la synran lang da u bah Ferdinand Jyrwa ha ka jingdon ryngkat ki nongkitkam ka Umrynjah S&CC bad kiwei kiwei. Ha kane ka lympung ialehkai ki la don baroh 32 tylli ki kynhun kiba la ia shim bynta.
