Shillong, Rymphang 09: Ka Laitkynsew CC bad ka Marbisu CC ki la jop ïa la ki jong ki jong ki jingïakhun ha ka lympung ïalehkai 4th District League T20 Cricket Tournament 2024, ba la pynïaid da ka East Khasi Hills Cricket Association [EKHCA], hynnin ka sngi Saitjaiñ ha Sohra.
Ka Laitkynsew ka la pynliem ïa ka Rangshken ACC da 48 ron ha ka jingïalehkai kaba nyngkong, katba ka Marbisu ka la beh nadien ban jop da 6 wiket bad pynsah sa 2.3 ober pyrshah ïa ka Mawryngkneng CC ha ka jingïalehkai kaba ar jong katei ka sngi.
Hadien ba jop ïa ka jingkynting pisa, ka Laitkynsew ka la jied ban tied nyngkong ha kaba ka la lah ban kamai 142 ron haduh kaba kut jong ka 20 over ba la mang bad hap 8 wiket, bad uba la kamai bun ron ïa ka kynhun u long u Jesper Malngiang (37 naki 27 bol). U Kisstar Janong u la khur 2/18 naki 4 ober.
Haba pyrshang jubab, ka Rangshken ka la shah pynhap lut baroh 10 wiket da tang 94 ron haka 18.1 ober bad u Larikupar Malngiang u la long uba kongsan tam ha ka bol da kaba khur 3/31 naki 4 ober bad u la khur syndon ïa ka khusnam Player of the Match. U Kyrmenskhem Nongrum u la long uba seisoh ha ka tied na ka liang jong ka Rangshken da kaba kamai 32 ron naki 18 bol.
Ha ka jingïalehkai kaba bud, ka Marbisu ka la jied ban bol nyngkong bad ka la lah ban khanglad ïa ka liang pyrshah ban kynjoh sha ka spah ron, ha kaba ka Mawryngkneng ka la shah pynkut noh da tang 99 ron bad hap lut baroh 10 wiket haka 18.2 ober. U Moonlight War u la long uba kynsai tam ha ka tied da kaba kamai 18 ron naki 15 bol, katba u Ramesh Rai u la tyngshaiñ bha da kaba khur 4/13 naki 4 ober.
Hadien ba seisoh ha ka bol u Ramesh u la wanphai ha ka tied ban thlieh 35 ron naki 23 bol kaba la ïarap ïa ka Marbisu ban kynjoh 100 ron tang ha ka 17.3 ober, bad hap 4 wiket. U Wankitlang Nongpluh u la khur 2/14 naki 4 ober na bynta ka Mawryngkneng. Namar ka jinglah jong u ban lehkai bha ha baroh ki liang (bol bad tied) u Ramesh u la ïoh ban khur syndon ïa ka khusnam Player of the Match.
