Nongpoh, Rymphang 08: Kum shibynta ban wad ïaki khynnah don sap haka kam ïalehkai kriket bad khamtam ban wad ïaki heprit kiba donsap bad ban pynpaw pyrthei ïakap sap ïalehkai, ka Ri-Bhoi District Cricket Association haka jingsnohkti lang bad ka Eastern Ri-Bhoi Cricket Development Unit mynta ka sngi kala pynlong ïaka Talent Hunt ha madna Kurkalang, Bhoirymbong naka bynta ki heprit naduh ka rta ba 10 snem haduh 16 snem ka rta kynthei bad shynrang.
Ïa katei ka prokram ban wad ïaki heprit donsap haka kam ïalehkai kirket la wan ban ai jinghikai da u Coach Shankar Newar (BCCI Level 1 Coach) bad kiwei kiwei haka jingdonlang u bah Rayonald Kharkamni President ka RBDCA haka jingiadonlang ki dkhot Eastern Ri-Bhoi Cricket Development Unit kiba kynthup ïa u bah AG Sten kum u Chairman, Bah Ynhunlang Mawroh Secretary, Bah Dhrity Syiem V Chairman bad u Bah Mathias Mynsong Asst. Secretary.
U Bah AG Sten, Chairman ka Eastern Ri-Bhoi Cricket Development Unit haba kren ha katei ka sngi u la ai iaka jingkhublei ïa u president ka RBDCA u Bah Rayonald Kharkamni ba dei lyngba ka jingshimkhia jong u la lah ban pynlong ïakane ka jingwat ïaki khynnah ïalehkai kriket na kane ka dong bad ka thaiñ Bhoirymbong.
U la ong ruh lyngba kane ka program kan long shisha ka jingmyntoi kaba khraw naka bynta ki heprit hakaba kin ioh ïaka lad ban shah hikai bad pyntbit da ka jingkhmih lynti ruh ba kin sa don ki heprit ki ban sa shah jied na ka bynta kiwei kiwei ki jinghikai kiba kham shalor.
Naka liang ka RBDCA kala pyntip ruh ba napdeng kitei ki heprit kiba la poi sha katei ka porkram hikai, yn jied ruh ïaki khynnah kiba kham kynsai bad don sap ban shah pyntriem shuh shuh haka academy ha Umsning bad naka bynta kito ki heprit kiba sah jngai bad shem jingeh ban beh sha ki academy ba la pynkhreh, naka liang ka RBDCA kan phah daki nonghikai sha ki jaka jong ki khnang ba kin nang bteng ban ioh ïaki jinghikai kaba paka.
