Shillong, Rymphang 09: Ka Lagan 2.0 bad ka Sanmer ki la pynthikna ïalade ban jam sha ka semi final haka lympung ïalehkai ‘Shillong Cricket League Third Division 2024-25’ ba la pynlong da ka Shillong Cricket Association ha madan Urkaliar, Shillong hynne ka sngi U Blei.
Ka Lagan 2.0 ka la pynliem ïa ka Inningstars Laitumkhrah da 57 ronn ha ka quarter final ba nyngkong, katba ka Sanmer ka la jop da 13 ron ïa ka Slog Warriors ha ka QF kaba bud.
Ka jingïalehkai kaba nyngkong, ka Inningstars Laitumkhrah ka la shim ïa ka rai ban bol nyngkong, bad ka Lagan 2.0 ka la lah ban kamai 208 ron haduh kaba kut jong ka 20 over da kaba hap 7 ngut ki nongtied. U Rohit u la long uba kynsai tam ha ka tied da kaba thlieh 73 ron naki 47 bol, katba u Anuj u la ïarap 42 ron naki 34 bol. U Akash u la khur 1/25 naki 3 ober.
Haba wanphai ban jubab ka Inningstars Laitumkhrah ka la tied 151/8 naki 20 ober kaba la pynlong ïa ka ban shah tam haduh 57 ron ha ka Lagan 2.0. Watla kata ruh u Suraj u la kamai 26 ron naki 10 bol, bad u Anil u la kamai 23 ron naki 16 bol.
Ha ka bol u Mukesh u la khur 2/16 naki 4 ober, katba u Anuj u la khur 2/18 naki 4 ober hynrei ka namtam lane Player of The Match ka la leit sha u Rohit uba la khyrwit haduh 73 ron.
Ka jingïalehkai kaba bud la sakhi ïa ka Sanmer kaba la shimti ban tied nyngkong ha kaba ka la lah ban kamai 179/6 haduh kaba kut jong ka 20 ober, u Donborlang (34 ron naki 29 bol) bad u Elton (31 ron naki 24 bol) ki long kiba seisoh tam ha ka tied. Haba phai sha ki rangkawang bol ka liang pyrshah, u Sonu u la khur 3/25 naki 4 ober, nangta u Rohan u la khur 2/40 naki 4 ober.
Haba pyrshang beh hadien ba wanphai ha ka tied ka Slog Warriors kam shym la lah ban poi sha ka thong ha ka tied, naba ka la ïohlad ban kamai tang 166/9 haduh kaba kut jong ka 20 ober. Watla hadien ba lehkai bha u Rajesh (73 ron naki 35 bol) hynrei ka kynhun ka dang sahdien da 13 ron.
U Wadbor u la khur 2/12 naki 3 ober, hynrei ka namtam ka long sha u Hubert uba la khur haduh 4/17 naki 4 ober ban khur syndon ïa ka khusnam Player of The Match.
