Nongpoh, Naitung 29: U Myntri sorkar ba dei ruh u MLA ka Jirang u Bah Sosthenes Sohtun u la pyntip ba ka jingdawa ban don noh ka shlem treikam (Regional Office) jong ka tnad Meghalaya State Pollution Control Board ha ka thaiñ Byrnihat kala urlong.
Haba kren sha ki lad pathai khubor naka liang u myntri u la ïathuh ba naka liang ka tnad MSPCB kala buh jingthoh naka por shaka por sha ka sorkar bad kum u myntri ruh u la buddien ïa kane ka kam ban ioh noh ka shlem treikam katei ka tnad haka thaiñ Byrnihat khnang ba kan pynsuk haka jingtreikam ban tehlakam ïaka jingpynkheiñ aiñ ki karkhana namar kumba long baroh shi katta lada don kano kano ka jingujor ki ophisar ki hap ban beh beit na Shillong.
U la ong ruh ba mynta la ioh ruh ïaka order ban shna ïa katei ka shlem treikam haka thaiñ Byrnihat khnang ba kan pynsuk ïaka tnad MSPCB ban peitngor ïaka thaiñ Byrnihat baroh kawei ha kaba ïadei bad ka jingjaboh ka lyer.
