Shillong, Naitung 29 : Kum ka jingshimkhia ïa ka jingnang kiew ki jingjia aksiden ne shah tynrah kali, ka Sorkar Jylla ka la bthah ïa ki bor synshar district ba kin nang pynkhlaiñ bad leh da kaba tyngeh ïa kito ki nongñiah kali kiba ñiah khlem akor.
U Symbud Myntri Rangbah ba khmih ïa ka kam Pohïing (Police) Bah Prestone Tynsong ula pyntip ba ka Tnad ka la ai ïa ka jingbthah kaba shai sha ki Deputy Commissioner (DC) bad Superintendent of Police (SP) ba kin shim ïa ki sienjam ba tyngeh ban tehlakam ïa ka rukom ñiah kali khlem akor kiba jia ha kylleng ka Jylla.
“Ngi la bthah ïa ki bor synshar district, ki DC bad SP, ba kin nang pyrshang shuh shuh ban pynthikna ba ki jingñiah kali khlem akor ba ngi ïohi man ka sngi, man ka taiew bad man u bnai kim dei ban jia shuh” ong u Bah Prestone haba ïakren bad ki nongthoh khubor ha ka sngi Balang.
Ula pynpaw ba ki jingïada ïa ki aksiden kali ka shong eh ha ka jingpyni kam jong ki bor district.
“Ka jingïada ïa ki aksiden kali ka shong eh halor ka jingtreikam ba man ka sngi jong ki bor district. Nga thikna ba da ka jingtrei shitom, ngin sa lah ban pynduna ïa kum kine ki jingjia kiba sngewsih” ula ong.
