Da ka Bill ban pynshitom ïa kiba donkti halor ka jinglait tuh ki jingkylli mynjur ka Lok Sabha

New Delhi, July 29: Ka ïing Dorbar Thaw Aiñ Lok Sabha ha ka sngi Balang ka la mynjur ia ki katto katne ki jingpynkylla ïa ki kyndon aiñ ban pyrkhing ïa ka jinglait tuh ki jingkylli ne ka Anti-Paper Leak, ka ban pynshitom jur ïa kiba leh ïa katei ka kam sniew, kan pynlyngkot ïa ka por tohkit bad ban pynthikna ïa ka jingai bishar kaba kloi, kum ka jingpyrshang ban wanrah pat ïa ka jingshaniah ki samla kiba wad kam bad kiba ïaleh ïa ki eksamin ki bapher bapher hadien ba kala mih ka kynrum kynram kaba la ktah jur ha kaba ïadei bad ka jingpynrung kam pynrung jam ha kylleng ki bynta jong ka ri ha kine ki khyndiat bnai kiba la dep.
Da kaba ai jingmynjur da ka sur ne Voice Vote hadien ba kala don ka jingïatai kaba khluid bha, ka Public Examinations (Prevention of Unfair Means) Amendment Bill, 2026 ka la ai shuh shuh ïa ki bniat ban pynheh ïa ka jingsiew ïa ka jingshah daiñ kuna bad ïa ki jingpynsajia, ban pynduna ïa ka por jong ka jingtohkit bad ban pynkloi ïa ki case kiba ïadei bad ka jinglait tuh ki jingkylli bad ïa ka jingïasylla ban leh tuh ïa ki eksamin.
Ha katei ka aiñ kaba la wanrah ïa ki jingpynkylla ka la pynkup bor ba ïa ki jingtohkit halor ka jinglait tuh ki jingkylli dei ban pyndep hapoh jong ka 2 bnai. Ki Jylla bad ki Union Territory kin hap ban thung kyrpang ïa ka Special Fast Track Courts kiba donkam ban shimkhia ïa kitei ki jingjia man la ka por. Kane ka Bill ka ailad ruh ban thung ïa ki Special Public Prosecutors bad batai ïa ka por kaba la buh ban ujor bad ban pynsted ïa baroh ki kam ki jam.
Uno uno uba la shem ba ula leh bakla un mad ïa ka jingshah set phatok kaba 5 haduh 10 snem, nalor kane bad ka jingsiew ïa ka kuna kaba kot haduh 50 lak tyngka. Ki jingïasylla da ki kynhun kiba donkti ha ka jinglait tuh ki jingkylli ne ban leh tuh ïa ki eksamin kin mad ïa ka jingsiew ïa ka kuna kaba kot haduh 10 Klur tyngka, lada lap ba kiba ai jingshakri (Service Provider) ne ki jaka pule (Institutions) ki la donkti ha ka ban leh thok kin shah pynsaja da kaba siew ïa ka kuna kaba kot 5 Klur tyngka bad ban khang shi syndon ïa ki ban pynlong ïa kino kino ki eksamin haduh 8 snem, naduh ka jingpyrkhing kaba la don lypa kaba long 4 snem.
Haba jubab ha ka jingïatainia, u Myntri ka Sorkar Pdeng u Jitendra Singh ula ong, ba kitei ki jingpynkylla ki dei da ka jingthmu ban pynthikna ïa ka jingpynkloi bad ban tehlakam ïa ka jingsniew na ka jinglait tuh ki jingkylli eksamin lyngba ki kyndon aiñ kiba pyrkhing bha. Ki dkhot ka Liang Pyrshah ruh ki la ai jingkyrshan ba dei ban leh da kaba tyngeh lyngba ki kyndon aiñ pyrshah ïa ki jinglehtuh hynrei ki la pynpaw pat ba tang ka jingthaw aiñ kan ym lah satia ban rat naduh tyllong ïa kane ka kam kaba la ktah ïa ka ri ha ka rukom pynïaid ïa ki eksamin.
Kane ka Bill ka la wan ha ka por kaba kongsan bha hadien ba ka la mih ka jingjia kaba ïadei bad ka NEET (UG) 2026 examination, kaba mynta ka la lam syndon sha ka jingshah khmih bniah, ka jingpynbitar ïa ki lak ngut ki samla pule kiba don ïa ka jingthrang ban ïoh ïa ki admission ha ki jingpule.
Dang ha kine ki taiew, ka CBI ka la ai ïa ka chargesheet kaba nyngkong halor ka jinglait tuh ki jingkylli jong ka eksamin NEET-UG 2026 pyrshah ïa ki 13 ngut ki riew shimet hapoh jongka Public Examinations (Prevention of Unfair Means) Act, 2024, ryngkat bad kiwei pat ki kyndon aiñ.
Kane ka jingpynkylla ïa ki kyndon aiñ, ka dei kaba la khmih lynti ba kan ktah wat ïa ki samla pule jong ka thaiñ shatei lam mihngi, ha kaba da ki phew hajar ngut ki samla kiba don ïa ka jingangnud ki ïakhun man la ka snem ïa ki eksamin ha ka ri kum ka NEET, CUET, JEE, SSC bad ki eksmain ban shah thung kam ha ki ophis jong ka Sorkar Pdeng. Ka Sorkar Pdeng kala pynpaw ba kane ka jingpynkhlaiñ shuh shuh ïa kane ka aiñ ka dei da ka jingthmu ban ai kloi ïa ka jingbishar kaba hok bad ban leh da kaba tyngeh pyrshah ïa kito kiba donkti ha ka ban leh tuh ne leh thok ïa ki eksamin.ïa kane ka Bill mynta yn sa phah sha Rajya Sabha na ka bynta ban ïoh ïa ka jingmynjur na katei pat ka ïing Dorbar Thawaiñ.