Sngap ka Sorkar Pdeng ïa ka jingud ki Balang Khristan kular shimkhia ban bishar ïa ka FCRA Bill : Dy.CM

Shillong, Naitung 29 : U Symbud Myntri Rangbah Bah Prestone Tynsong ha ka Sngi Balang ula ong ba ka Sorkar Pdeng ka la ai ka jingkular ïa ka kynhun jong ki Balang Khristan bapher bapher na Meghalaya ba kan bishar bniah bad wanrah ki jingpynkylla ïa ki kyndon ba la tyrwa ha ka FCRA Amendment Bill kiba ktah ïa ka jingtreikam ki Balang ha ka thaiñ Shatei Lam Mihngi khamtam ha Meghalaya.
Haba kren sha ki nongthoh khubor, u Bah Prestone ula ong ba u Myntri Rangbah Conrad K Sangma ula ïalam dang shen ïa ka kynhun ki nongïalam Balang sha Delhi ban ïakynduh ïa ki nongïalam ka Sorkar Pdeng halor kane ka kam.
“U CM ula ïalam ïa ka kynhun sha Delhi bad ïakynduh ïa katto katne ki nongïalam jong ka Sorkar Pdeng. Ki la kular ïa ka kynhun ba kin sa shim khia ban wanrah ki jingpynkylla ïa ki kyndon jong ka amendment bill kiba ktah ïa ka jingtreikam ki Balang ha ka thaiñ Shatei Lam Mihngi khamtam ha Meghalaya” ong u Bah Prestone.
Hynrei ula pynpaw pat ba um pat don jingtip ïa mynta la ka Sorkar pdeng ka la wanrah ne em ïa ka jingpynkylla.
“Ia mynta hi ngam pat tip la kala pynkylla ne em ïa ka amendment. Kumta ngam lah ban ong eiei” ula ong.
Haba pynshai ïa ka jingtreikam jong kane ka aiñ, u Bah Prestone ula ong ba ka FCRA kam treikam satia tang ïa ki jaka treikam jong ki Khristan.
“Peit shane, ka FCRA kam mut ba dei tang ïa ki Khristan. Phi hap ban sngewthuh ïa kata. Ka FCRA ka dei ïa ki seng bapher bapher. Ka treikam ha baroh kawei ka ri” ula ong.
“Ka jingsngewkhia jong ngi hi ka long ha ka liang ki Khristan bad ngi la dep pynsngew ïa kane ka jingeh bad ngi la dep tyrwa ruh ïa ka jingpynkylla. Kumba nga ong, nga dang ban ïoh ïa ka jingtip la ïa ki kyndon ba ngi la aiti sha ka Sorkar India la dep mynjur ne em. Tad hadien ba nga la ïoh jingtip, ngam pat lah ban ïathuh eiei ïa phi”.
Halor ka jingkylli la ka Sorkar Jylla kan pyrshah ïa ka bill, u Bah Prestone ula pynpaw ba ka dang kloi palat ban shim ïa ka nongrim halor kane.