Pyrshah jur ka JYF ïa ki jingthmu ka company Shree Cement ban tei ïa ka cement plant bad ban khlong mawshun

Khliehriat naitung 29: Ka Jaiñtia Youth Federation (JYF) hapoh ka jingialam u President u bah B.Chyrmang bad u Secretary u bah J.Pala, mynta ka sngi ki la buh da ka jingthoh hakhmat u Member Secretary jong ka Meghalaya State Pollution Control Board bad pynpaw ba ka seng ka pyrshah jur ïa baroh ki jingthmu jong ka company Shree Cement bad dawa ba dei ban kyntait mardor ïa baroh ki project ba ka Shree Cement ka thmu ban pyntrei.
Katkum ka shithi ne dorkhas ba la buh ha ophis jong ka Meghalaya State Pollution Control Board, ka seng ka pynpaw ka ka pyrshah jur ïa ka jingthmu ka company Shree Cement ban tei ïa ka Cement Plant ha elaka Nongkhlieh, ka seng ka pyrshah jur ruh ïa ka jingthmu ka company ban khlong ïa u mawshun na Lum Syrman na ka par mawshun kaba heh 217.394 hectar, ka seng ka pyrshah jur ban shna ïa ka Primary bad Secondary crusher ha Lum Syrman ba hap hapoh elaka Nongkhlieh East Jaiñtia Hills District.
La ong ba ka jingthmu ka company ban pyntrei ïa ki project ha elaka Nongkhlieh ka long kaba ym lah ban pdiang, namar ka jingdon ki karkhana kiba heh kan ktah ïa ka koit ka khiah jong ki paidbah, kan ktah jur ïa ka mariang ha kaba kan da don ka jingpom pathar ïa ki dieng ki siej bad kane ka ktah jur ïa ka jinglong jingman ka mariang, ka jingdon ki karkhana ka pynmih ruh ïa ka jingsawa lane ka Noise Pollution, kan pynmih ïa u pum pum ba jakhlia, kan pynmih ruh ïa ka lyer ba jakhlia kaban ktah jur ïa ka jinglong jingman ka lyer bad ka ban buh jingma ïa ka koit ka khiah jong ki paidbah ha kaba ring bad pynhiar mynsiem.
Shuh shuh ka JYF ka pynpaw ka jingsngew khia ba lada don ki karkhana kiba heh kan ktah ruh ïa ki jaka puta ba ju rep ki briew kaba lah ban ktah ïa ka ioh ka kot jong ki paidbah namar ka jingshah ktah ki jaka rep.
Ka seng ka sngewkhia jur namar ka East Jaiñtia Hills District ka la shah ktah na ka daw ka jingdon ki karkhana bad lada wan sa ka Shree Cement ka jingshah ktah kan nang jur shuh shuh, la ong ruh ba ïa ki project ne jingthmu jong ka Shree Cement la pyrshah ruh da ki briew jong ka thaiñ kiba na elaka Nongkhlieh bad lada ïa ki jingthmu ne ki project jong ka Shree cement yn ailad ba kin ïaid shakhmat ka mut ba ka la don ka jingïuhroit bad jingpynkheiñ ïa ki hok bad jingsngew jong ki paidbah, kumta ka JYF ka dawa jur ïa ka tnat ba dei peit ba kan kyntait mardor ïa ki jingthmu ka company khnang ban iada ïa ki hok jong ki paidbah.