Pyrshah ka JSU ïa ka Public Hearing ka Shree Cement, kynnoh donktilang u Myntri Rangbah

Jowai, Naitung 29: Ka Jaiñtia Students’ Union (JSU) Central Body lyngba u President jong ka u Jersom Shylla kala pyntip hadien ka jingïalang ba kyrkieh mynta ka sngi Balang ha ophis treikam ka seng, halor ka Public Hearing jong ka Company Shree Cement ka ban long haka 31 tarik mynta u bnai.
Na ka liang ka seng JSU kala rai ban ïeng pyrshah beit ïa katei ka Public Hearing ne ka jingpynsngew paidbah bala khot pynlong da ka Meghalaya State Pollution Control Board (MSPCB).
Ula pynsngew haka 22 tarik u Jymmang da ka jingthmu ban pynlong ïa ka Public Hearing na ka bynta ka Shree Cement, ka sorkar kala pyndonkam pynban da ki pulit bad ki mafia ban khanglad ïa kiba thmu ban leit sha ka jingïalang.
Kaba pynlyngngoh shuh shuh ïa ka seng ka long balei pat ka MSPCB kala khot pynlong biang mar mar ïa kane ka Public Hearing haka 31 tarik u Naitung wat hadien bala dep pynpulom ïa ka haka 22 tarik u Jymmang, sa kawei ruh ïaka por kaba dei ban pynlong 10 baje la khot noh haka por 8 baje mynstep bad kane ka lah ban don kaei re kaei sha lyndet.
Na ka liang utei u President Jersom Shylla ula ong baka seng ka tip ba u Myntri Rangbha ka Jylla u don kti lang bad ka company Shree Cement kala la thmu ban pynïaid beit shakhmat ïa kane ka jingpynsngew paidbah.
Shuh shuh ula ong ka seng ka ïeng skhem bad ki paidbah nongshong shnong jong ka Elaka Nongkhlieh, East Jaiñtia Hills District kiba dei ki trai jaka bad ki nongrep kiba la shah knieh jubor ïa ki jaka puta da ka jingleh u Dolloi, wat ka seng kala dep ïakhih pyrshah ïa kane hynrei ka JHADC kam don jingkitkhlieh satia.
“Kum ki paidbah nongshnong shnong ki don ka hok ban ïashim bynta haka Public Hearing bad kim dei satai ban shah khanglad ban ïoh pynsngew ïaka jingpyrshah jong ki” la ong utei u President.
Sa kawei ula ong ka jaka ba thmu ban tih mawshun da ka Company Shree Cement ha Lum Syrman ka don hajan ka Wildlife Sanctuary, ka Krem Liat Prah bad ka krem Kut Sutiang ha kaba u Kiang Nangbah bad ki nongïaleh khlawait ka Ri ki ju rieh tngen hapoh katei ka krem bad baroh kitei ki jaka kim duh kin dam noh na ka jingshah pynjulor lada katei ka Company kan ïohlad ban tih mawshuh.
‘Lada ngim kyndit bynriew shuh mynta shano kan poi ka jait bynriew, wat ïa ki khlaw ba rben jong ka thaiñ Narpuh haba nujor mynta kiba shah ktah lut naka jingwan ki Company Cement kiba kot haduh 8 tylli bad kiba dang treikam mynta nalor sa ka jingbym ïoh myntoi ki trai jylla haka ïohkam ïohkam”. Kumta u khot lang ban ïamih paidhbah bad ban pyrshah ïa katei ka Public Hearing ka ban long haka 31 tarik.