Under-15 Boys Subroto Cup 2024: Sdang ka M’laya da ka namjop pyrshah ïa ka kynhun na Sri Lanka

Shillong, Nailar 19: Ka kynhun ïalehkai phutbol Under-15 shynrang jong ka jylla Meghalaya ba la mihkhmat da ka Nongjri Presbyterian Secondary School jong ka Ri-Bhoi ka la sdang ïa ka lynti ïaid ha ka Subroto Cup 2024 da ka namjop hadien ba ka la pynbam haduh shiteng dorjon (6kol) ïa ka kynhun na Sri Lanka ha ka jingïakhun na ka Group B ha Bangalore.
Ka namtam ka long sha u Chanjib Chetry u ba la khyrwit da ka hat-trick, nangta ryngkat ki kol ba la pynkhih da u Marc R Marak, Prosperwell Ryntong bad u Banteilang Malieh.
Lah ban kdew ba ka Nongjri Presbyterian Secondary School kaba na Ri-Bhoi, ka la ïoh ban mihkhmat ïa ka jylla sha katei ka kyrdan ïakhun dei hadien ba ka la rah namlahduh ha ka state-level Subroto Cup ha u bnai ba ladep.
Na ka thup jong ka Group B ki don san tylli ki kynhun, nalor ka Meghalaya bad ka kynhun na Sri Lanka, ki kynhun ki kynthup ïa ka Madhya Pradesh, International Schools Sports Organisation (ISSO) bad ka Dadra and Nagar Haveli & Daman and Diu (DNH&DD).
Da kane ka namjop, ka Meghalaya kan pynkhreh ïalade ha ka jingïakhun kaba bud pyrshah ïa ka Madhya Pradesh mynta ka sngi ha ka por 10:30 baje mynstep.