Ujor ka MC&GO sha u CFO bym shimkhia ka tnad Forest bad ba mih pynban ki jaka khrong khajna ha ki surok bah
Jur ka jingshalan beaiñ ïa u rnga lyngba ka Ri-Bhoi
Nongpoh, Lber 12: Ka Meghalaya Clean & Green Organization (MC&GO) kaba dei kawei ka seng ïeid mariang bad peit pyrman ïa ki kam pynjot mariang ka la ujor mardor sha u Chief Forest Officer (CFO) jong ka Khasi Hills Autonomous District Council (KHADC) halor ka jingjur shaba palat ka jingshalan be-aiñ ïa u rnga bad khamtam ka jingpynjot ïa ki khlaw ki btap bad ki dieng ki siej ka la long kaba shyrkhei ha kaba wat ki mrad bad ki sim ki doh kim ioh jaka shuh wat ban shong rieh tngen.
Ki nongïalam jong ka MC&GO ba kynthup ïa u President u Bah RG Warjri bad u General Secretary u Bah S. nongkhlaw ki la pynpaw ba ka tnad Forest jong ka Sorkar Jylla bad ka District Council ki dei ban thung da ka kynhun tohkit halor ka jingkhrong pisa be-aiñ jong ki Forest Check Gate na ki trok kit rnga ha shilynter ki surok.
Ha ka jingthoh ba la ujor sha u CFO ka KHADC, ka MC&GO ka la pynpaw ruh ba ka jingshalan be-aiñ ïa u rnga ka la long kaba shyrkhei ha kaba ki trok kit rnga ki ju wan lyngba ka surok na Mawmaram sha Mawlyndep, Umbir bad mih sha Lad Umsaw nangta ka surok na Dongki Ingding, Umpdem, Sohjarang, Zero Point bad mih sha Umsning, kumjuh ruh na bynta kito kiba pyndonkam ïa ka surok na Umrit bad kaba mih sha Umling.
Ki nongïalam jong ka MC&GO ki la pynpaw ruh ba katkum ka jingïathuh jong ki nongñiah trok kiba kit rnga ki hap ban siew ïa ka khajna kaba T.500, T.1000 bad T.1500 sha ki jaka khrong khajna bapher bapher jong ka tnad Forest bad District Council.
Halor kane ka bynta, ka seng hadien ka jingujor sha u Chief Forest Officer ka District Council, ki la dawa ba dei ban pynsted ïa ka jingtohkit bad ba lada kam don kano kano ka jingshimkhia ïa kane ka kam na ka liang jong ki dkhot ka seng kin sa hiar hi da lade ban leit jurip kyndit ïa ki jaka khrong khajna bad ban leh da kaba tyngeh halor ka jingkhrong pisa beaiñ ïa ki trok kiba kit be-aiñ ïa u rnga khlem da ioh ïa ki Transit Pass.
Ka Seng ka la pynpaw ruh ba kam tuklar ïa ka jinglong trai ïa ki khlaw hynrei dei ban ïaid katkum ki lynti jong ka aiñ, namarba kum ka seng ka la hiar jurip bad lap shibun ki khlaw kiba la syllen lut na ka jingpom pathar ïa ki dieng ki siej.
Namarkata, ka seng ka la kyrpad ïa ki bor ba dei peit ban shim khia ïa kane ka kam khnang ban ïada ïa ka jingshah pynjot jong ka mei-mariang khamtam ka jingthang bad shalan be-aiñ ïa u rnga.