Leit ai mynsiem ki Khasi kiba sah ha Mumbai ïa u nongrep synsar na Bhoirymbong

0

Shillong, Lber, 12: Tang katto katne por ba ka khubor ka la saphriang ha YouTube Channel jong ka Batesi TV, shi kynhun ki Khasi kiba pule bad kiba trei ha nongbah Mumbai ki la leit ai mynsiem ïa u Bah Hilarius Mukhim u nongrep synsar na ka shnong Mawshut, kaba hap hapoh ka Bhoirymbong C&RD Block, Ribhoi District uba la mihkhmat ïa ka Farmers Producer Organisation (FPO) ban ïashim bynta ha ka jingpyninam ïa ki mar rep ha ka Mahalakshmi Saras Exhibition-2023 kaba la long ha Mumbai naduh ka 8 tarik haduh 19 tarik Lber 2023. Ka Farmers Producer Organisation (FPO) ka dei kaba la tip kyrteng kum ka Basuba Broom Producer Company Ltd. ka ju pynïaid iew ïa u synsar ba la pynmih da ki nongrep na ka thaiñ Bhoirymbong manla u snem.
Ha kane ka iew pyninam ïa ki marrep bad ka jingïakynduh ïa ki nongkhaii na kylleng ki jylla bapher bapher ha ka Mahalakshmi Saras Exhibition-2023 u Bah Hilarius Mukhim u la pynpaw ïa ka jingsngew kyndit ba dang bun ki briew hapoh ka ri India kiba pyndonkam ïa u synsar hynrei kim tip pat ïa ka jaka nangno la pynmih ïa u synsar.
Kane ka jingïashim bynta jong u ha kane ka iew pyninam ka long kum ka sienjam ban pynithuh ïa u synsar uba la pynmih na ka jylla Meghalaya ban shalan sha ki bynta bapher bapher jong ka ri India bad shabar ka ri.
U Bah Ibanshan Basaïawmoit u Khasi uba sah ha Mumbai u la ong, “bun ki bym tip kumno ngi rep ngi riang. Nga dang lap mynta ba la die ïa u synsar ha Mumbai. Ka jingwanrah ïa u synshar sha Mumbai kan ïarap ïa ki nongrep ban pynïaid iew ïa u synsar ha ka dor kaba bit bad kan pynïohnong ar shah namarba bunsien ki nongkhaii ki ju khñiot dor haba ki thied ïa u synsar na ki nongrep ha ka dor kaba tad.”
U la ong ruh ba ka jingwanrah ïa u synshar ha kane ka iew pyninam ïa ki mar rep kan pynlong ïa ki briew na kylleng ka ri ban tip kumno ka dur jong u synsar ka long.
U samla Rangjit Khongsar uba trei ha Mumbai uba la leit jngoh ïa ka dukan die synshar jong u Bah Hilarius u la ong ba kane ka dei ka jingsdang ban pynïaid iew ïa u synsar sha ka ri baroh kawei.
“Ïa u synsar la thied beit da ki nongkhaii kiba khñiot ïa ka dor jong ki nongrep. Hynrei lyngba kane ka iew pyninam ki nongrep kin sa lah ban ïakynduh beit markhmat bad ki nongthied ha kaba kan pynmyntoi ruh shikatdei ïa ki,” ong u samla Khongsar.
Ka Sorkar Jylla ka la ai jingithuh ïa u synshar kum u mar rep ha u snem 2019.

Leave A Reply

Your email address will not be published.