Shillong, Lber 12 : U President ka BJP ha ka jylla, Bah Ernest Mawrie u la kubur ba ki paidbah ka jylla haduh mynta kim pat pdiang satia ïa ka party, hadien ba na ki 60 ngut ki kyrtong ba ka pynieng, kiba jop pat ki long tang arngut ha kane ka elekshon ba dang shu dep.
“Ngi burom ïa ka rai jong ki padbah ka jylla, watla ka jingwan ïalap elekshon kadei kaba la wan naduh u Myntri Rangbahduh ka Ri, u Myntri Kampohiing, u National President ka party, ki Myntri ka Sorkar Pdeng kynthup naduh u Nitin Gadkari bad kiewi kiwei hynrei katta ruh ki paidbah kim pat pdiang ïa ka party jongngi.”
U Bah Ernest u la ong ruh ba la katta ruh ki sngew burom pat ïa u Myntri Rangbahduh ka Ri bad kumjuh ïa u Myntri Kampohiing kiba la burom ïa ka rai jong u paidbah da kaba wan ban shim bynta lang ha ka sngi pynbam smai ïa ka kynhun Myntri.
“Katei kadei ka khubor kaba khlain bha namar watla ngi jop tang arngut hynrei ngi don pat bad ki paidbah ka jylla,” u la ong.
Halor ka jingkylli, u President u la ong ruh ba ka daw halor ka jingbym lah jong ka party ban leh bha ha kane ka elekshon ba dang shu dep kadei halor ka jingphriang ki khubor hamsaïa lyngba ki social media kaba la jur bha pyrshah ïa ka party kaba kynnoh ba ka BJP kadei kaba pyrshah khristan.
Shuh shuh u ong kawei pat ka long ba ki paidbah ka Meghalaya kim pat sngewthuh ïa ka jingmut jong ka roi ka pa. “Ngam tip ba kiwei ki politishan ki shim kabu ba da kaba ki kam ba kitei ki skim kidei kiba la wanrah da ma ki hynrei ha ka jingshisha kitei kidei kiba la wan beit beit na Delhi,” u la ong.
Nalorkata, u ong ruh ba kum u khliehduh jong ka party u la ju kyntu bunsien ïa ki paidbah ka jylla ba ki dei ban jied ïa ka party na ka bynta ka roi ka pa bad ka shongsuk shongsain. “Hynrei ki paidbah kim ai satia ïa ka jingkyrshan jong ki bad kumta ngi neh biang kumjuh tang arngut, kaba mut hi ba kim pat pdiang ïa ka BJP,” la bynrap shuh shuh u President.
La ïathuh ruh ba ha kane ka sngi Saitjain u la dep ruh ban shong ïa ka jingïalang bad ki kyrtong jong baroh 59 tylli ki constituency. “Ngi la buddien bad ngi la dep ruh ban wad ïa ka daw bad ngi la ïohsngew ruh ïa ka jingïathuh na ki kyrtong bapher bapher bad ngi la buh jingmut ruh ïa ki na ka bynta ban pynkhlaiñ shuh shuh ïa ka party.”
Ha kajuh ka por, u Bah Mawrie u la ong ruh ba ki la dep ban ïa kren ruh na ka bynta ka jingpynkhreh ïa ka elekshon Lok Sabha bad ruh na bynta ka elekshon MDC ha KHADC bad JHADC ha u 2024.
