Shillong, Lber 12 : Ka Bharatiya Janata Party (BJP) ha ka jylla Meghalaya, kan ïai bteng ban buddien ïa ka jingdawa pyntreikam ïa ka Inner Line Permit (ILP) bad ban pynrung ïa ka ktien Khasi bad Garo hapoh ka khyrnit ba phra jong ka riti synshar ka ri India watla ki paidbah ki khlem ailad ïa ka Party ba kan ïoh thaw ne ïalam ïa ka sorkar Meghalaya.
ïa kane la pynpaw u Nongïalam ka BJP bad Myntri ka Tnad Animal Husbandry and Veterinary bah A.L Hek haba ïakren bad ki lad pathai khubor.
U Bah Hek ula pynpaw ba ka BJP kan ïatreilang bad ka Sorkar Meghalaya Democratic Alliance (MDA 2.0) ban ïai pynbor ïa ka sorkar pdeng ban pynurlong ïa ki jingdawa ka jylla.
“Ki paidbah ka jylla ki khlem ailad ïa ka BJP ban thaw ne ïalam ïa ka sorkar Meghalaya hynrei watla kata naka liang ka Party kan ïai buddien bad ka sorkar pdeng halor ka jingdawa ILP bad ban ïoh jingithuh ïa ka ktien Khasi bad Garo hapoh ka khyrnit ba phra ka riti synshar ka ri India namar ka Party ka sngewthuh ïa ka jingangnud ki paidbah nong shong shnong ka jylla” la ong u bah Hek.
U bah Hek ula ong ruh ba kum ka Party kaba don lang hapoh ka sorkar MDA, kan pynbor ïa ka sorkar jylla ban pynurlong ïa ki katto katne ki mat baka BJP ka bsuh hapoh ka Manifesto naka bynta ka jingmyntoi ki paidbah ka jylla.
Ula ong ba ka BJP kan kyrshan ïa kaei kaei kaba ka ka sorkar MDA ba ïalam daka NPP ka shim na ka bynta ka bha ka miat ki paidbah hynrei kan long ba peitngor ruh ban pynthikna ba kino kino ki rai ba ka sorkar ka shim kim dei ban ktah ïa ka bha ka miat jong u paidbah.
