Khliehriat Lber 12:Da ki hajar ngut ki riew ngeit kristan kiba na ki hynriew tylli ki presbytery bad kumjuh ki presbytery ba marjan ki la ïa poi sha ka jingïaseng Synod, Biateram Presbyterian Church Synod kaba 27, ba la pynlong ha shnong Muallian, East Jaiñtia Hills District kaba la sdang naduh ka sngi thohdieng, ïa ka phang pdeng jong kane ka jingïaseng la buh na ka kitab jong u Janah, lynnong 1 ka dkhot ba 6 “ To khie to duwai ha u Blei jong me…”
Ki nongkren kiba la kren ha ki jingïaseng ruh ki la sam ïa ka ktien u Blei kaba katkum ka phangpdeng ba la buh, kumjuh ruh ha ka jingïaseng kaba 10.30 mynstep jong ka sngi u Blei la ïoh ban pynkyntang (ordaination) ïa u Rev Nunmoia Ngamlai bad la pynkup burom ruh ïa ki ar ngut ki pastor ki ban shongthait noh, ïa kane ka jingïaseng la pynïaid da u Moderator jong ka Biateram Presbyterian Church Synod, u Rev Samuel Saithwai bad ïa ia ka jingpynkyntang pastor (ordination) la pynïaid da u Rev D.C.Haia bad la sam ïa ka ktien u Blei, da u Rev Lalthantluanga, la ïoh ruh ïa ka choir na ka KVP Saipung Bial bad ka Synod Zaipol.
U Rev. Remsiama Ngamlai, uba dei u pastor jong ka Balang Mualsei, la ïathuh ba katei ka phangpdeng, ka dei ka kyntien shem mynsiem (Spiritual Theme) jong ka Biateran Presbyterian Church Synod kaba 27 kaba ong “To khie to duwai ha u Blei jong me…”, la ong ruh ba kane ka phangpdeng ka hikai ïa ngi baroh ba ngi dei ban pynthymmai ïa ka jingim, ka jinglong kristan kaba kynja mynsiem ha ka jingim jong ngi shimet-shi met bad u Blei bad kumjuh ruh ha ka jingim kaba ïadei bad ka imlang ka sahlang, ban don ka jingkitkhlieh ruh ïa ki jingmane Blei ha ki iingmane ha kaba ïadei bad ka jinglong ka bym don ka jingsngew ïapher niam “Ka iingmane ka dei ka jaka jong ka jingsuk bad ka jingbishar ba hok ha ka imlang ka sahlang” u la pynpaw.
Ha ka jingïaseng kaba ha ka por 1.30 noh phai sngi, la ïalam da ka jingïaseng kynthei Synod PNP Inkhom, ha kaba la ïoh ïa ka jingkren na ka Pi Roibongi Nampui, kaba na ka Balang Saipung, kaba la sam ïa ka ktien u Blei kaba katkum katei ka phangpdeng bad ha ka por 6.30 janmiet, la sam ïa ka ktein u Blei da u Rev D.C.Haia.
Ha ka por myn sngi, ha ka sngi thohdieng bad sngi saitjaiñ, la pynlong ïa ki seminar (Business Session) bad ha ka por janmiet la pynlong ïa ki jingïaseng paidbah, ki la don haduh 700 ngut ki dkhot delegate kiba la poi sha kane ka jingïaseng Synod ha Muallian.
Kumban shu pashat jingtip, kane ka Biateran Presbyterian Church Synod, ka dei kaba la pynïakhlad na ka Khasi Jaiñtia Presbyterian Synod naduh u snem 1996, ki Presbytery kiba hap hapoh kane ka Synod ki kynthup ka Saipung Presbytery, ka Ramthar Presbytery, kiba don ha Meghalaya, ka Zoiram Presbytery, kaba hap lang ha Meghalaya bad Assam, ka Riam Presbytery, ka Ramhoi Presbytery, kiba hap lang ha Meghalaya bad Assam, ka Sangbar Presbytery, kaba hap ha Assam, kane ka Synod ka don ruh ïa ka Mission treikam kaba ïar bha, ha kaba ka Head Quatar jong kane ka Mission jongbka Synod, ka don ha Fiangpui, ha Haflong, Assam, ka Mission ka la lah ban buh haduh hynñiew tylli ki skul, ha kaba saw tylli ki skul ki don hapoh ka jylla Assam bad lai tylli ki skul ki don ha Meghalaya (ha saipung, ha Muallian bad ha Ladrymbai).
