Ther ki Pastor ha ka Synod Sepngi ba sam pisa por elekshon

0

Lyngkhoi, Lber 12: Ha ka jingïaseng paidbah jong ka KJP Synod Sepngi kaba la long ha Balang Lyngkhoi mynta ka sngi, baroh arngut ki Pastor kiba la kren bad sam ia khubor ha kane ka Jingiaseng, kata u Rev. Dr. BL Nongbri uba la kren ha ka jingïaseng kaba 10:30 mynstep bad u Rev. P. Hynñiewta uba la kren ha ka jingïaseng kaba 1:30 mynsngi, ki la ther tyngeh ïa ka jingsam pisa da ki Kyrtong bad ki Party ha ka elekshon kaba dang shu dep.
U Pastor Nongbri, u la ong ba ki Khristan kibym ithuh ïa U Jisu kum U Trai hynrei kiba shu ithuh kum U Khrist, ki leh ïa kane ka la kam kaba long pyrshah ïa ka mon U Blei.
“Ka long kaei kaei kaba sngewkhia ba bun ki khun ka Balang ki ïadon bynta lang ha ka jingïasam pisa ha ka por elekshon kaba long ka jingleh kaba pynsngewsih ïa U Blei”, la ong u Principal ka JRTC.
U Pastor Hynñiewta Moderator barim ka KJP Synod Sepngi, u la kren ruh halor ka jingsynshar donbor bad lehbeiñ ïa ki Samla bad ki briew kiba duk ha kine ki san snem kiba ladep da ki bor synshar bad ong ba lada kim kylla kaba mut kin shah bishar ha U Blei.
U Pastor Hynñiewta u la ong ruh ba u khunbynriew u la leh pop pyrshah ìa U Blei haba u la pynjot ïa ka mei mariang kaba la wanrah ka jingpluh ki khlaw, ka jingkhynñiuh jumai ha kylleng ka pyrthei..
Ha kane ka Jingiaseng la ia don lang ruh arngut ki Nongmihkhmat ka Balang Kmie na ri Wales.
Palat shi lak ngut ki paid riewngeit na kylleng ki Balang hapoh ka Synod Sepngi ki la poi sha kane ka jingiaseng ha Lyngkhoi.

Leave A Reply

Your email address will not be published.