Hadien ka Dorbar Mang Tyngka yn khot ka sorkar ïa ka HPC ban pynkynriah na ïew Mawlong : Dy CM II

Shillong, Lber 12 : Ka sorkar jylla ka la rai ban khot ïa ki dkhot ka Harijan Panchayat Committee (HPC) hadien ka Dorbar Mang Tyngka jongka jylla na ka bynta ban ïakren bad pynbeit ban pynkynriah noh ïa baroh ki Kharmetor na Them ïew Mawlong, ong u Symbud Myntri Rangbah ba ar u Ma Sniawbhalang Dhar.
“ Ngin sa khot ïa ki hadien ka Dorbar Mang Tyngka ban ïa pynbeit noh ïa kane ka kam “ ong u ma Sniawbhalang Dhar.
U la ïathuh ba un sa ïa kren ruh bad u Symbud Myntri Rangbah ba nyngkong u bah Prestone Tynsong shwa ban khot ïa ki nongïalam ka HPC sha ka jingïakren.
Dang ha ka 16 tarik Rymphang ka ïing bishar High Court jongka jylla ka la bthah ïa ka sorkar jylla ban pynbeit noh kloi ïa kane ka kam ba sahteng kata ban pynkynriah ïa ki Kharmetor na Them Iew Mawlong bad la bthah ba dei ban leh ïa kane mar mar hadien ba la kut ka Election MLA.
“ Ka sorkar ka dei ban pyrshang katba lah ban pynsted ïa kane ka kam hadien ka eelction namar la dep pynthikna da ka sorkar ba ka la dep ïoh ruh ïa ka jaka ban pynkynriah noh ïa ki sha wei na kane ka jaka ba ki don mynta” ong ka hukum jongka Division Bench ba la khlieh da u Chief Justice Sanjib Banerjee.
Ka Division Bench ka la pynpaw ruh ba ïa kane ka kam la pynsahteng la katto katne por hadien ba la ïoh pdiang ïa ki jingkyrpad na baroh arliang ban pynbeit ia kane ka kam shabar jongka ïing bishar hynrei namar ka la slem bad shu sahteng ka ïing bishar ka la shim bishar biang bad kan shong bishar biang ruh ha ka 17 tarik Lber 2023.
Kumta dei halor kane ka nongrim ba u Symbud Myntri Rangbah II ruh u la ong ba ka sorkar kan sa khot ïakren ïa ki hadien ka Dorbar Mang Tyngka namar hap ban pynbeit noh kloi ïa kane ka kam kumba la bthah da ka ïing bishar.