Ujor ka Longkmie ba duh khaw rashon, kynnoh byrngem kyntait shnong u Waheh Shnong

Jowai, Jymmang 24: Kawei ka longkmie kaba la tip kyrteng kum ka Linda Nongkrem naka shnong Lumtrep Nongjngi kaba don ïa ka Ration Card Number 170000372140 lem bad ki katto katne ngut kiba don ha katei ka shnong kila ujor sha u Deputy Commissioner (Supply) ka West Jaiñtia Hills District pyrshah ïa u Pyniaiddame Pale uba long kum u nongsam ‘Fair Price Shop Dealer’ ha Lumtrep & Iangker Center halor ka jingbymïoh khwa rashon jong ki.
La ïathuh da katei ka kong Linda hadien ka jingujor ha ka sien ba nyngkong sha ki bor sorkar la dep ban ïasoi ïa ki kot ki sla hakhmat jong ki ophisar bad u Rangbah Shnong bad la rai ba ki dei hok ban ïoh ïa u khaw rashon ha ka dor 3 tyngka shi kilo, hynrei haduh mynta kam pat ïoh khaw rashon satia naduh u bnai ba ar (Rymphang) 2022.
Kala ong ruh ynda kila thmu ban leit shim khaw rashon na ka katei ka dukan sam khaw, utei u Rangbah Shnong ka Lumtrep u ma Ebormi Pale ula ong ‘lada kim treh ban shim ha ka dor 4 tyngka shi kilo kin ym ïoh khaw satia, ula kren shai ba kim dei ban wan shim khaw rashon shuh na katei ka Center’.
Halor kane katei ka longkmie kala buh jingkylli ïa ki bor ba dei peit bad ka kwah ruh ban tip hato kum ki nongïalam shnong ki don mo ka bor ban leh kumne? nalor ba ki bor sorkar kiba dep ban wan pynbeit ïa kane ka kam hynrei ka dang ïai jia kumjuh hi. Kala ong ruh dei u Rangbah Shnong ma Ebormi Pale hi uba la pynksan ïa utei u Dealer ma Pyniaiddame Pale ban nym ai khaw ïa ki ha ka dor ba la mang da ka sorkar kaba long 3 tyngka.
Halor kane sa shisien katei ka longkmie kala buh biang ka jingkyrpad ïa ka ophis u DC (Supply) ban shim khia mardor ïa kane ka kam, khnang ba ka rukom sam khaw ha ka shnong kan long kaba ïaidbeit ïaid ryntih khlem da don ka jingleh shilliang.
Sa kawei kaba pynsngewsih ïa katei ka longkmie kong Linda Nongkrem haba ïakren bad u Mawphor kala ïathuh ha kane ka sngi saitjain jong ka 14 tarik u Jymmang kiba ha ïing jong ka ba kynthup ïa ka kmie ka kong Klur Nongkrem bad ka khun jong ka para jong ka ha ka por ba ki mut ban leit soi ïa ka Job Card shispah sngi ïa kaba u Waheh Shnong ula kular baroh kiba don Job Card kim don kam ban leit trei bad ïa ka pisa kaba 3 hajar tyngka kawei ka Job Card yn ïasam bad u Waheh Shnong mar 15 spah tyngka.
Hynrei ynda kila mut ban leit register ha ïing jong utei u Waheh Shnong ula pynmih ïa ki kyntien da kaba ong ba kim don kyrteng shuh hapoh ka shnong bad ki la dep shah kyntait shnong baroh saw ïing kiba don jingïadei bad ka kong Linda, halor kane ka jingshah byrngem kyntait shnong ka kong Linda kala buh jingkylli hato utei u Waheh Shnong u don hok mo ban leh ïa kane ka kam.