Byrngem ka seng kan khang tala noh ïa ka ophis ka NHAI bad ki khyrdop khrong pisa

Khliehriat, Jymmang 25: Ka East Jaiñtia National Council Khliehriat Circle, ka pynpaw ka jingsngew khia halor ka jingbym shim khia ka National Highway Authority of India ban maramot ïa ka surok NH-6 ha East Jaiñtia Hills District bad ong ba lada kam shim khia kane ka surok mynta ka buh jingma ïa ki paidbah kiba leit ba wan na kane ka surok, halor kane ka seng ka ai por iya ka NHAI tang ar taïew ba ka dei ban maramot noh ïa ka surok.
Ka seng ka byrngem ruh ba lada ka NHAI kam maramot ïa ka surok hapoh ar taïew, ka seng kan hiar ban khang tala noh shi syndon ïa ka ophis bad ïa ka khyrdop khrong pisa jong ka NHAI kaba don ha Lumshnong.
Ka seng myn ha ka 23 tarik mynta u bnai ka la leit ban buh da ka jingthoh ha khmat u Deputy Commissioner ka eayst Jaiñtia Hills District bad kyntu ruh ba un shim khia ban bthah ïa ka NHAI ba kan shim khia ban maramot ïa ka surok.
Katkum ka shithi ba la phah sah u Deputy Commissioner, ba la soi da u President EJNC Khliehriat Circle, u samla Sanjoy Bareh bad u General Secretary u samla Mebanteilang Sukhlaiñ, ka seng ka la pynpaw ïa ka jinglong jingman ka surok national highway ha East Jaiñtia Hills, ha kaba ka surok ka la jot bad julor bha bad dap sa tang ki thliew kiba lang um bad don ki jaka ba ka rong surok ka la pait la pra na ka daw ka jingjur slap, don bun ki jaka ba ki nala tuid um ruh ki la duh la dam “Watla bun kiba la ud bad ujor halor ka jinglong jingman ka surok hynrei ka jing ud jing ujor kam poi shano shano ruh bad ka surok ka shu sah kumjuh hi ha ka jingjot jingjulor kaba buh jingma bad pyn jynjar ïa ki nongleit nongwan.
La ong ruh ba na ka liang u Deputy Commissioner, u Abhilash Banarwal, u la kular ba un sa kren bad bthah ïa ka NHAI ba ka dei ban shim khia ïa kane ka kam.