Jowai, Naitung, 19: Kawei na ki kynhun kaba peit ïaka bha ka miat jong ka Wah Myntdu ka ‘Khooid Ya ka Wah Myntdu’ hadien ba la ïoh jingtip ba don kiba khlongmaw ha ka por mynmiet narud ka Wah Myntdu (Treïongriang), da kaba pyndonkam da ka JCB bad ki trok Dumper.
Mar mar ka kynhun kala hiar sha katei ka jaka da ka jingsynran lang ki dkhot ka Jaiñtia Studemt Movement (JSM) bad ki pulit, ynda la poi ha katei ka jaka haka por kumba 11 shiteng mynmiet, kila ïoh ban kem ïa kitei ki briew ba pynkheiñ ïa ka kyndon jong ka NGT kaba la khang pyrshah ban khlong maw na ki bynta ka Wah Myntu.
Ha ka jingtohkit ka seng kala lap ba kitei ki briew kiba khlong maw kila ïathuh ba la hukum ïa ki ban leit khlong maw da u ma F. Hinge da kaba leit kit ban pynhap ïa kitei ki maw ha Lad Mustep.
Halor kane ka jingpynkheiñ aiñ jong kitei ki briew na ka liang u President ka Khood Ya ka Wah Myntdu u ma Khroo. L. Pariat ula pyntip ba ki dep ban ujor syndon da ka ejahar (FIR) ha Jowai Police Station na ka bynta ban pynshitom tyngeh ïa kitei ki briew ba donkti.
