Pyndam ka JSU ïa ka kyrteng Civil Hospital ha Khliehriat bym pat biang ki kor sumar

Jowai, Naitung, 19: Ka Jaiñtia Student Union (JSU) Khliehriat Circle hapoh ka jinglam u President u samla Livingson Sama , u General Secretary U Ajoymenson Lyngdoh haka jingdon ryngkat u Vice President u samla Winson Salahe bad ki dkhot ka seng mynta ka sngi ki lah leit ban kynduh ïa u DMHO bad u Medical Officer bad tohkit bniah ïaka jinglong jingman ka Hospital ha Khliehriat kaba dang shu dep pynkiew kyrdan dang ha u snem ba lah dep sha ka Civil Hospital Khliehriat.
Hynrei phewse naka liang ka seng ka lap da la jong ki khmat ba ha kane ka jingleit jurip la lap ba kane ka hospital ka dang sah dien wat hadien ba lah dep pynkiew kyrdan sha ka Civil Hospital.
Halor kane ka seng ka dap da ka jingbitar hadien ka jingïohi bad lap ïaka jingsah dien kane ka jaka sumar bad kaba kham pynsngewsih ïaki nongïalam ka seng ka long ba ka sorkar ka la ieh beiñ ïa kane ka thaiñ wad hadien lah 12 snem tam ka jingïoh Distrik ka thaiñ hynrei ka sorkar kam shim khia ban pynbiang ïaki jaka sumar.
Kitei ki nongïalam seng ki la ong ruh ba ka sorkar jylla ka ïoh kham bun ka khjna na ka East Jaiñtia hynrei ïaka roi ka par hapoh ka thaiñ kam lah ban pynbiang bad ka seng ka la shim da ka rai ban pyndam shuwa ïaka kyteng ka hospital ka “Civil Hospital” bad sieh lama ïong, katba ka sorkar kam pat lah ban pynbiang ïaki kor ki bor bad ki jaka sumar hapoh kane ka Hospital paitbah bad bun sien ki nongshong shnong kihap ban leit phah sumar shaduh sha Ialong Civil Hospital Jowai bad kane ka buh jingeh ïaki pautbah namar ka jaka sumar ka long kaba jngai.