Ki daw ba kongsan ba khyllem noh u Bah Titos kum u CEM ka KHADC

Ka jingshah pynhap noh u Bah Titos kum u CEM ym dei na ki daw ne ki jingïatrei kam ha KHADC. Ki MDC ha KHADC lait noh katto katne ngut ki kmen ïa ka EC u Bah Titos, ki daw ki dei na shabar ka KHADC. Kine harum ki dei ki daw:-
1. Ka jing pynhap ïa u Bah Titos ka dei tang ka jingsdang ban weng ïa ka UDP na ka sorkar MDA.
Ki nongïalam ka NPP na khasi -Jaintia Hill kim sngewtynnad ïa ka UDP namar kadei ka party heh ha Khasi -Jaintia hill bad ha ka election ka NPP ka hiar na Khasi -Jaintia namar ka UDP ka biang ka bor ban ïakhun pyrshah ïa ka NPP. Ki don ruh ki jingïa knieh kam contract bad ki wei ki kam ha kylleng ki jaka hapdeng ki NPP bad UDP, te ki nongïalam ka NPP na Khasi-Jaintia ki kwah ban kham ioh nong bad ki kwah ba ka UDP kan nym don lang shuh ha ka sorkar.
2. Ka dei ka plan jong ka NPP ban phiah (split) ïa ka UDP. Mynta ka UDP lada kan neh ha ka sorkar MDA kin shem jingeh namar la shah peit suh ha KHADC, ba kin mih ruh ki shem jingeh namar yn don beit ki MLA ba kwah don ha ka sorkar. Ka NPP ka lah ban ong ïa ki Minister/ MLA ka UDP ba lada ki dang kwah long minister ne kwah don ha sorkar kin ïaleh ban ioh ïa ka 2/3 majority, ki MLA ban ïasoh noh sha ka NPP. Lada ka UDP kan pait, ka NPP ka pyrkhat ba kan dang khlaiñ ha Khasi -Jaintia.
3. Ka jingïatrei lang jong ka NPP bad ka Congress ka la sdang naduh ka elekshon ba lah dep ha Manipur. Ka NPP ka la pynkhreh bha ban ïa treilang bad ka Congress ha Manipur, hynrei ba kim biang ka jingdon MLA ka pulom noh bad dei na kane ka daw ba ka NPP kam ioh eiei na ka sorkar BJP ha Manipur. Naduh ba jop biang ka Congress ha Karnataka ki heh NPP ki la leit kynduh ïa ki MLA ka Congress bad ka don ka jingïakut ba lada wan ka sorkar UPA ha Delhi (GoI) ka NPP kan ïa shna sorkar noh bad ka Congress ha Meghalaya. Lada jia ba kan dang wan ka NDA ha Delhi, ki Congress na Meghalaya kin ïasoh noh bad ka NPP bad kin ïa shna sorkar noh tang ka NPP bad BJP ha Meghalaya. Ki wei ki party sharud kin beh.
Ka jingioh LO bad Opposition Chief whip ki MLA Congress bad ka jingïatrei lang ki MDC ka Congress bad NPP ha KHADC ka mih na kane ka jingïakut. Ha ka election MP ban wan, ki NPP napoh kin kyrshan ïa u kyrtong ka Congress ha Shillong Parliamentary seat bad ki Congress kin kyrshan ïa ka kyrtong jong ka NPP ha Tura Parlia-mentary seat. Hooid, ki lah ban sei kyrtong bad ïa beiñ ha ki campaign para ma ki, hynrei napoh kin ïarap mar kylliang.