Khliehriat kyllalyngkot 11: Ki pulit jong ka East Jaiñtia Hills District, hynnin ka sngi ki la ujor da ka ejahar (Suo Motu Case) halor ka jingiap ki nongtih dewïong ha ha East Jaiñtia Hills District kaba long katkum ba la paw ha ki pathai khubor, na ka liang ki pulit mar mar ki la pynlong ïa ka jingtohkit bad ki dang wad bniah halor kane ka jingjia.
Kumba la paw ha ki pathai khubor, la ong ba ki la don haduh lai ngut ki nongtih dewïong kiba la iap hapoh ka krem dewïong kaba don ha elaka Rymbai, napdeng kiba khlad u wei u dei uba la tip kyrteng kum u (L) Ten Siangshai, uba na ka shnong Musniang bad ym pat shym la tip kyrteng ïa ki ar ngut kiwei pat kiba la iap ha ka krem dewiong.
Na ka liang ki bor pulit ki la pyntreikam da ki kyndon 160 bad 91CrPC bad ai jingtip sha baroh ki rangbah shnong bad kin wad jingtip bad pynshai lem halor ka jingjia kumba la paw ha ki pathai khubor, ha kajuh ka por ki pulit ki la wad jingtip ruh na baroh ki PHC bad ki CHC bad pan ïa ki kaiphot jong ki met iap, ki la phah ruh ïa ka kynhun pulit sha ki shnong bapher bapher khamtam ha shnong Musniang ban wad bniah ïa kane ka jingjia, ki la buh ruh ïa ki briew (source) ban ai jingtip lem halor kane bad kat haduh mynta ki pulit ki dang pynlong ïa ka jingwad bniah bad tohkit ban ïoh jingtip shuh shuh halor kane ka jingjia.
Kumba paw ha ki pathai khubor, la ong ba wat hapdeng ka jingmana ba la mana da ka iïng bishar, hynrei ka jingtih dewiong beaiñ ka dang bteng bad ong ruh ba ki don ki nongtrei kiba la wanrah na bar ruh ban tih dewiong beaiñ bad halor kane, na ka liang ki pulit ki dang tohkit bad wad bniah.
