Shillong, K’lyngkot 11 : U Myntri Rangbah ka Jylla Conrad K Sangma hynne ka sngi Balang, ula pyntip ba ka jingtih dewiong da ka jingstad saian kat kum kane ka juk ba mynta kan sa sdang noh shen ha Jylla Meghalaya.
“Mynta ka kam ban tih dewiong da ka jingstad saian bad ka jingpan ïa ka mining plan ban ïoh jingmynjur, kila don bad ka Sorkar Pdeng” ula ïathuh haba ïakren bad ki lad pathai khubor.
Halor ka jingkynnoh u Nongïalam ka Liang Pyrshah (AITC) u Dr Mukul Sangma baka Sorkar MDA kam kwah ban sdang ïa ka jingtih dewiong ba ïaid kat kum ka aiñ ha Jylla, u Conrad ula kynthoh kylla da kaba ong “U Dr Mukul ula klet ba dei ha ka por jong u kum u Myntri Rangbah ba la khang ïa ka jingtih dewiong” bad bynrap “Ngim tip ba ula leh aiu ha kine ki san snem halor kane ka kam”.
Haba pynpaw ba ka sorkar jong u, ka la leit ban ïakhun pyrshah ïa ka hukum ka NGT hapoh ïing bishar Supreme Court, ula ong “Ngi (MDA) la lah ban weng ïa ka jingkhang tih dewiong. Bad hadien bala weng ïa ka hukum, ngi la applai ïa 18 tylli ki licence kiba la ïoh bad mynta ïa ki mining plan jong kine, la dep aiti bad ngi kyrmen ba ka kam kan ïaid shakhmat”.
Haba thalaiñ ïa ka Liang Pyrshah halor ka jingbym kren ïa ka jingshisha, u Myntri Rangbah ula ong “Ki la klet ba dei ha ka por jong ki ba la mih ka hukum ka NGT ba khang ïa ka jingtih dewiong hynrei dei kane ka Sorkar kaba la lah ban weng noh ïa kane ka hukum (NGT) lyngba ka hukum jong ka ïing Bishar Supreme Court”.
Halor ka jingujor ka AITC pyrshah ïa ka NPP ba kam lah ban ai jingkheiñ ïa ki jingpynlut ha ka elekshon bala dep, une u Nongïalam ka NPP ula ong “Kila leit ban ujor mukotduma ha Iing Bishar hynrei ka Iing Bishar kala kyntait ban shim bishar ïaka”.
