U rangbah bapura u dei uba don jingkitkhlieh ïa ka ing, ka imlang bad ka Balang: Archbishop Victor

By Mawphor News Desk On Apr 24, 2023

Shillong, ïaïong, 23: “Ki rangbah ba la longkpa ki dei kiba don jingkitkhlieh ïa ka iing ka sem. U longkpa ràngbah pura u dei uba kit babah ïa ka lyngkor kaba khia ha ka imlang ka sahlang bad ïa ka Balang kaba don jingim,” ong u Archbishop ka Jylla Niambah Shillong u Most Rev. Victor Lyngdoh haba kren sha ki rangbah kiba ïashim bynta ha ka lympungbah kaba XIV jong ka Synjuk ki Seng Ràngbah Katholik ka Jylla Niam Bah Shillong.
Kane ka lympungbah kaba ar sngi ka la long ha phyllaw jong ka Iingmane St. Terasa, Parish Nongshyrngan, Pynursla.
U Archbishop Victor Lyngdoh u pynshlur ruh ïa ki rangbah longkpa kiba la kit ïa ka iing ka sem bad ïa ka shnong ka thaw ki dei kiba la im da ka jingduwai manla ka sngi nalor ba ki long ruh ki nongïarap bad ki nongkyrshan ïa ki jingdonkam ïa ka iing ka sem khamtam ïa ki khun ki kti.
Ka phang pdeng jong kane ka lympungbah ka long, “Ai ba ka mynsiem rangbah kan janai, khnang ba phin dup janai haban da pura bha-U Rangbah ha ka juk mynta” ïa kaba la sot na ka shithi u Jakob 1:4.
Da ki hajar ngut ki rangbah na ki 7 tylli ki Zone jong ka Jylla Niambah Shillong hapoh ka jingïalam jong u Spiritual Director ka Synjuk u Rev. Fr. Andreas Pariat bad ki nongkitkam ka Synjuk u Bah Carlus Kharkongor President, u General Secretary u Bah Geoff Preslee Marbaniang ki la poi ban ïashim bynta ha kane ka lympung.
Shwa kane, kata ha ka sngi Saitjaiñ la plie ïa kane ka lympung jingïakynduh lang kaba khatsaw da u Vicar General ka Jyllaniambah Shillong u Rev.Fr. Richard Manbha Majaw da kaba kyntiew ïa ka lama bad ka jingpynbud ïa ki jingïaphylliew halor ka phang ba u Rangbah u dei ban long uba janai.
Watla ki bor mariang ki la tynjuh ïa ki paid u Blei hynrei ki rangbah kiba la poi ha kane ka ka lympung kim shym la khih satia.
Ïa ka nguh ka dem Blei ha kane ka sngi, la synran lang da u Fr. Andreas Pariat, u Fr. Robert Khyriem uba long u Parish Priest jong ka Parish Nongshyrngan bad kiwei pat ki Lyngdoh Sohblei.
Ha ka por nohphai sngi, ka mariang ka la ailad ban pyndep ïa kane ka jingïakynduh lang da ka jingmane Sakrament bad ka jingpynhap noh ïa ka lama jong ka Synjuk da u Archbishop Victor Lyngdoh bad ka jingpynbna ïa ka lympung kaba 15 ka ban sa long ha u snem 2024 ha Parish Wahlang-Zone IV da u Sohblei Andreas Pariat Spiritual Director ka Synjuk.