Shillong, ïaïong, 23: Ka Khasi Students Union (KSU) Upper Shillong Circle ha ka Sngi Saitjaiñ ka la leit jngoh ïa ka Kong Batemon Jyrwa kaba sah ha shnong Umlyngka kaba la shah tied klep ha ki runar ki bym lah ban ithuh durkhmat ha ka miet 20 tarik mynta u bnai katba ka dang wan phai na ka jingbylla.
Kane ka longkmie haduh mynta ka dang don hapdeng ka jingsumar ha Dr. H. Gordon Robert Hospital, Shillong.
Kane ka jingshah shoh dusmon jong kane ka longkmie ka la jia ha ka shnong Umlyngka kaba kane ka longkmie ka shong ka sah.
U President jong ka KSU Umlyngka Unit u samla Pynskhemlang Syiem u la ong ba ka seng ka pynrem jur ïa kine ki riew thrang snam ki bym don shuh ka jingisynei wat ïa ki longkmie ban shu shoh shu dat haba ïaid ba ïeng ki bym don shuh ka mynsiem ïatiplem ka mynsiem isynei, ban leh ïa ki kam pyntriem ha ki jaka ba dum.
Ka seng ka kyntu ruh ïa ki bor jong ka aiñ ba kin nym kheiñ sting ïa kane ka kam hynrei kin wad tad haduh na kin da lap ïa kine ki briew bad kan pynshitom tyngeh kat kum ki kyndon aiñ, khnang ba kum kine ki jaitbriew kim dei shuh ban don ha shnong ha thaw khang ba ki kynthei ki khynnah kin ïaid shngaiñ mynsiem ha la shnong la thaw.
