U pud ka Ri Khasi naduh lum Meikha shaduh pynthor ka Sarma, na Rilang ha Kupli: Paiem L. Syiem

Jowai, Naitung, 23: Ka Namdong Block & Laskeiñ Block Border Area Peace Committee (NB&LBAPC) ha kane ka sngi saitjaiñ ka la pynlong ïa ka jingïalang bah kaba nyngkong naka bynta ban ïalum kawei ka jingmut kumno ban wanrah ïa ka jingïatylli kum ki nongshong shnong kiba shong ba sah ha ki jaka Khappud ka Block-1.
Ka jingthmu jong kane ka jingïalang ka long shi bynta ban pynrung ha ki jingmut jingpyrkhat jong ki nongshong shnong khappud ba kin wan ha kawei ka sur bad ban ïaleh nangne shakhmat ïa ki jingeh ba ïakynduh da ki phew phew snem bad ki briew ka Assam.
La pynsngew na ka por sha ka por ki paid Pnar kiba shong basah ha khappud kim don ïa kata ka jingïatylli lada wan ki jingshah lehbieñ da ki briew jong ka Assam (Karbi) bad kane ka jingbym don ka jingïatylli ka dang ïoh lad shuh shuh ïa kitei ki briew jong ka Assam ban leh katba mon.
Ha kane ka jingïalang da kawei ka sur ki la rai nangne shakhmat da ka jingïatylli kawei lada don kino kino ki jingwan lehbor da ki briew ka Assam, kin long kiba la khreh na baroh shi lynter ki shnong khappud ban ïaleh pyrshah.
La wan ban ïadonlang ha kane ka sngi naduh u Syiem ka Hima Mylliem u Paiem Laborious S. Syiem, u Wondel Passah nonghikai bala shongthiat na ka St. Edmund’s College, u nongïasaid aiñ ba rangbah u ma Erwin K Sutnga, u ma M.M. Thaiang uwei na ki nongïakhun uba dang bteng haduh mynta ban pynwan biang ïa ki shnong Pnar shapoh ka Jaiñtia. Ki Waheh Shnong naduh Khanduli, Moolaber, Moojem, Moobhar, Mukroh, Lapangap, ki dkhot ka KSU ha ryngkat ki paidbah naduh ki longkpa, ki longkmie bad ki khun samla ka Khanduli.
Ïa ka jingïalang ha kane ka sngi la pynïaid da u u Chairman ka NB&LBAPC u ma Aiborlang Shadap uba long ruh u MDC ka Barato, uba la ong “lada ngin don ka jingïadei lok para ma ngi hapdeng ki shnong khappud kan buh jingma shi katdei eh” kumta la thaw khnang ïa kane ka Committee ban ïa pyntylli baroh.
U Paiem Syiem ka Hima Mylliem bah L. Syiem ha ka jingkren ula ong kaba nyngkong eh donkam ban sngewthuh ïa ka jinglong trei la jong khnang ban nud ban kren ïa ka jingshisha, ula pynkynmaw ba ka Ri Khasi Jaiñtia ka la ïoh kyrpang ïa kine ki lum bathiang dei lyngba ka Dorbar Blei ba nyngkong ha sahit bneng da kita ki khadhynriew skum ki khadhynriew trep.
Kumta ïa u pud jong ka Ri Khasi la tip ïa ka naduh kita ki por ba wan hiar ki khun u Hynñiew trep hynñiew skum na sahitbneng kaba don ïa ka u pud u sam naduh ka kjat lum ka Meikha shaduh pynthor ka Sarma, na Rilang ha Kupli kata ka dei ka pud jong ka Ri Khasi Jaiñtia. Hynrei mynta ka Assam ka la ïoh ban kyntur bad kam jubor ha kiba bun ki jaka.
Shuh shuh ula ong kane ka jia bad ki jingeh ki mih baroh dei ka jingbakla ha ka por ba ïoh ïa ka Hill State, namar ha kata ka por la pdiang ïa ka jylla khlem da don ïa u pud u sam ba pura katkum ïa ki jaka ka Ri Laiphew Syiem Khadar Daloi.
Ha ka ïadei bad ka jingpynbeit pud ki ar jylla na ka liang ki ar Myntri Rangbah (Assam bad Meghalaya) kin sa wan hiar sha Khanduli ban jurip ïa u pud u sam, kumta u kyntu ïa baroh ki 36 shnong jong kitei ki thaiñ ba kin pyrta kawei ka sur ba ‘kane ka dei ka ri umsnam jong u Ni u kong, kane ka dei ka Ri jong ngi bad kadei ban hap hapoh Meghlaya’.
U la kren shai da ka jingïatylli lang kawei ‘ym don jingeh ba kitei ki shnong Pnar jong ka Block-1 kin wan phai biang shapoh Meghalaya hadien ka jingpynbeit pud ki ar jylla’.