Shillong, Naitung, 22: Ka jingpynslem jong ki bor ka NEIGRIHMS Hospital haduh kumba saw kynta eiei ban ai jingsumar ïa uwei u samla bar jylla uba la tip kyrteng kum u Suraj Prasad Gupta, 22 snem, ba sah ha Rilbong, Shillong uba la mynsaw ha ka jingjia aksiden ha Umïam ha ka sngi U Blei ha ka por kumba 11 baje mynstep, ka la pynkhie bitar ïa ki paralok jong u bad ïa ki bahaïing hasem jong u kat haduh ba ki la hap ban ïapynibor bad ki nongap pahara jong kane ka Hospital.
Ha ka jingïakren bad u nonglum khubor, ki paralok jong u Suraj Prasad Gupta ki la kynnoh ba ki nongsumar jong kane ka Hospital kim shym la ai jingsumar kyrkieh ïa u Suraj naduh ba la pynpoi ïa u ha NEIGRIHMS Hospital ha ka por kumba 11:30 baje mynstep haduh ka por 3 baje nohphai sngi.
Ki la kynnoh shuh shuh ba ki nongai jingsumar jong kane ka Hospital ki la shu ieh beit kumto haduh saw kynta watla une u samla u la don hapdeng ka jingphlei snam na ka jingjia aksiden hadien ba ki Nurse jong ka Hospital ki la kam ba ym don doktor.
Ha ka video ba la ring hi da ki paralok jong u Suraj ïa kiba la ai sha u nonglum khubor, la ïohi ba ki bahaing hasem bad ki paralok u Gupta ki la khie bitar bad pyrshang ban ïa nia bad pynibor bad ki nongap pahara hakhmat ka Emergency Room jong ka hospital.
