Nongstoiñ, Jylliew 05: Ka ophis jong ka KHADC lyngba ka tnad ka Khlaw, mynta ka sngi ka la hiar sha ka thaiñ Athiabari West Khasi Hills District, ban thung dieng ha ki katto katne ki jaka jong ka KHADC, kaba long ruh kum shi bynta ban rakhe ïa ka sngi ka Mei mariang ne ka World Environment Day.
Ha kane ka sngi u Doctor Juristman Ïawphñiaw MDC ka Nongstoiñ Constituency, u la long kum u kongsan bad u la ïashimbynta lang ruh ban thung dieng ryngkat ka jingïasynran u Bah Elbert Nongrum Ranger Officer, u ba dei peit ïa ka Aradonga Range, u sordar ka shnong Athiabari, kiwei ki ophisar na ka tnad Forest bad ki riew rangbah jong ka thaiñ.
U kongsan haba ai jingkren la ong katba nang ïaid ki por la ïohi ba ki khlaw ki btap ki la sdang syllen. Kumta kam dei ban shu peit ïa ka jingmyntoi kaba mynta, hynrei hap pyrkhat ruh na ka bynta ka lawei ki pateng, namar lada bun ki khlaw ka lyer kan long kaba khuid bad ki briew ruh kin long kiba koit ba khiah bha. Hynrei lada duna ki khlaw ki briew ruh kin ym lah ban long kiba khlaiñ ne khiah krat. U la ong ba ka lah dei ka por ban nang kumno ban tyngkai ïa ka Mei mariang.
Katba na ka liang u bah Elbert Nongrum Ranger Officer, u la ai ka jingkren kumno ban pynneh pynsah ïa ka mei mariang bad u la pynkynmaw ïa baroh, ba ka pyrthei baroh kawei lyngba ka United Nations, ka la pynbna ba man ka 5 tarik u bnai Jylliew kan long kum ka sngi ba kyrpang ban burom ïa ka Mei mariang ne kata ka World Environment Day.
Ïa katei ka jingïalang la pynïaid da u bah Naster Kharlyngdoh uwei na ki riew rangbah jong ka thaiñ bad la sakhilang da u bah Bendrowell Hashah na ka KHADC, ki paidbah katei ka shnong Athiabari bad kiwei kiwei.
