U Danggo u dei u briew uba kylla tdong tdong khlieh khlieh : Pala

Shillong, Rymphang 05: U President jong ka Meghalaya Pradesh Congress Committee (MPCC) u Bah Vincent H Pala u la ong ba u MLA barim ka Congress na Ranikor u Bah Martin M Danggo u long u briew uba kylla tdong tdong khlieh khlieh lada peit na kaei kaba u la leh ha kine ki snem kiba la leit.
Ïa kane u Bah Pala u la kren haba kynthoh halor ka rai jong u u ban shukor ïa ka NPP ha ka minit kaba khatduh ban leit ïakhun noh na ka tiket jong ka Bharatiya Janata Party ha kane ka elekshon kaban long ha ka 27 Rymphang.
“U (Danggo) u la jop na ka Congress bad khlem kino kino ki daw u la phet na ka party ban ïakhun pat ïa ka by-election na ka tiket jong ka NPP bad u la shah rem noh. Hadien ba u la ïasoh sha kka NPP u la wanphai biang sha ka party. Nga la lap ban ïatreilang bad u katto katne bnai bad tang hadien u la phet biang na ka party ban ïasoh biang sha ka NPP bad tang hadien khyndiat por u phet biang pat sa na ka NPP ban leit sha ka BJP…lada peit hi na ki kam bad ki jynleh jong u u long u briew uba kylla khlieh khlieh tdong tdong bad uba ym lah shaniah,” u la ong.
“Ngim tip ruh tad haduh ba un thep kyrteng la un thep kyrteng kum u kyrtong ka NPP ne ka BJP hynrei ym pat na ka Congress namar kumba phi tip ngi la don la u kyrtong nangtei,” u la bynrap.
Shuh shuh u Bah Pala u la ong ba um kwah ban kynthoh halor ka jingstad bad ka jingshemphang jong u namar u la dei u politishian uba la ih bha ka rta ha ka jylli ka saiñ pyrthei ka jylla.
“Hynrei tang kawei kaba nga kwah ban kynthoh ka long ba u long u briew uba ngim lah ban tip lupa kaei kaba u mut ban leh. U don la ka rukom pyrkhat, hynrei kaei kaba u leh pat ka pynphalang ïa ka ka jinglong, ka rukom pyrkhat,” u la ong.