‘U briew bym ju bun ktien hynrei u pynpaw da ki kam,’ ïaroh u Conrad Sangma ïa u Bah Kimfa
Kiba kynthoh ïa ka NPP ki long kum u myrsiang bad u soh grape: Prestone
Rambrai, Nohprah, 30: Ha ka sngi palei ka seng saiñ pyrthei National People’s Party, ka la pdiang burom ïa u bah Kimfa Sidney Marbaniang MLA ka Rambrai Jyrngam konstitwensi, ha kaba u Conrad K.Sangma National President ka National People’s Party u la hiar sha Rambrai ban pdïang burom ïa utei u MLA sha ka seng.
Ha katei ka jingïalang pdiang burom, la ïadonlang ruh u bah Prestone Tyngsong Symbud Myntri Rangbah ka jylla Meghalaya, bah Sñiawbhalang Dhar myntri sorkar, u bah Macmillan Byrsat MLA, kong Ampareen Lyngdoh MLA, u bah Mahindro Rapsang MLA bad kiwei kiwei bad la pynïaid ïa katei ka jingïalang da u samla Bajop Pyngrope MDC ka Rambrai Jyrngam konstitwensi.
Ha katei ka sngi nalor utei u MLA ka Rambrai Jyrngam konstitwensi, la ïohi ruh ba da ki hajar ngut ki nongbud jong u, ki la wan ban synran lang ïa utei u MLA bad ha kajuh ka por ki la pynïasnoh lang sha katei ka sem kaba thymmai.
Na ka liang u Conrad Sangma haba ai jingkren u la ïaroh shikatdei eh ïa ka rai jong u MLA ka Rambrai, ban pynïasoh noh ïalade sha ka party NPP. U da ong ruh ba kane ka sien jam ba u ne u MLA ka Rambrai u shim kan long ka jingmyntoi ym tang ïa ka party hynrei kyrpang na ka bynta ki paidbah ka Rambrai Constituency hi baroh kawei. Shuh shuh, u la ong ruh ba u Bah Kimfa hi barabor u dei u briew u bym ju bun ktien, hynrei u dei pat u briew u ba ki kam ki kren kham jam man ka por.
Ka kong Ampareen Lyngdoh MLA haba ai jingkren, ka la ong kiwei ki seng ki dei tang ki seng nongwei suda bad kiba ym I don jingkyrmen haei haei ruh. Hynrei mynta dei satang ka seng NPP kaba I don jingkyrmen ha ka Jylla na ka bynta ban synshar dalade ïalade.
U bah Prestone Tyngsong Symbud Myntri Rangbah ka jylla Meghalaya, u la ther tyngeh ïa kiwei pat ki seng kiba ju kynthoh ïa ka seng NPP da kaba u la ong, “Ki dei tang kum u to u myrsiang u ba kynthih katba lah ban ïoh kheit ïa u soh Grape, hynrei haba um lah ban kot sha u dieng, u la lum lang ïa ki para myrsiang bad u ong wat leit wat tang shajan u to u dieng namar u to u soh u long u ba jew”.