Lait na ka Congress, kiwei ki dei ki party ‘ñiangkohnguh BJP suda: Vincent Pala

Nongstoiñ, Nohprah, 30: Ka election MLA ka la ha jan bad ka lyer jong ka jingïalap ban pynksan ïa la ki seng ka la sdang ban beh kat shaba lap bad ha man la ki shnong ki thaw, ha kaba la ïoh sngew bad ïohi ruh ba shibun ki briew ki la sdang khohreh ban pynkhreh ne shut pynnep ïa la ki reng ban mih madan ha u snem 2023 na ka bynta ka election MLA.
Haba pyrshang ban buddien la lap bad ïoh jingtip kyllum lang ba na baroh kawei ka jylla ka don shisha shibun ki jingkylla, ha kaba ki briew ki rung ki mih na kawei ka sem sha kawei pat, khamtam eh ki nongïalam kiba kham hakhmat na man la ki seng Saiñ pyrthei bad ka la long ruh kaba eh ban ïa bishar la mano ban dang neh bad mano ban kyllon, mano ban poi sha ka thong bad mano ban pulom. Namar ha kane ka kynti kat haduh mynta haba pyrshang ban khmih la shem ba ka la kham pher shisha bak ly bak haba ïa nujor bad ki election kiba mynshuwa ha ki snem kiba lah dep.
Haba ïadei bad kane ka phang, u nongthoh khubor haba pyrshang ban ïakren bad u Ma Vincent H.Pala MP ka Lok Sabha na ka Shillong Seat, u la ong, “Nga ïohi ba ki briew mynta ki phai khmat sha ka Congress. Kiwei te ki dei tang ki para jong ka BJP ki ban long tang ki ‘ñiang kohnguh”.
“Ki paidbah ki klumar namar ka jingïakhaïi ïa ki nongïalam jong ki seng saiñ pyrthei na kawei ka seng sha kawei pat. Hynrei haba nga tur sha ki shnong ki thaw nga ïohi ba ki briew ki phai sha ka Congress, khamtam lada ka dei ha ka synshar khaddar ne ha ka suk ka saiñ kum ka law and order, khamtam eh ïa ngi ki khristan kiba dei tang ki rit paid ha ri India”, u la ong
“Lada ka Congress ka khlaiñ ka don ka jingshngaiñ bad ka jingshaniah ka don ha ka Congress ban ïa kiwei pat kum ka NPP ne ka UDP ki long kiba tieng eit kim ju long ba la pynkhreh ban ieng hapdeng ki jingeh. Tang shu mad jingeh ki lah pyndem tdong, namar balei kawei ka long ba kim pat tbit ban long nongsynshar ne nongïalam bad kim don ka mynsiem ban shakri paidbah. Ki don beit thik tang ka mynsiem kumno ban kamai ban khaïi ïa u paidbah ha kum kane ka juk kaba dap da ki kor ki bor mashin kaba ngi ong ki social media”, u la ong
“Hynrei, nga ngeit ba bun ki la sngewthuh shai bad ki briew ki lah stad bad shemphang wat ki nongkyndong ruh, ba kine ki party ki wan ki pynjot namar lada ka tlot ka rukom synshar haba ki nongsynshar ne ki ophisar ki long kiba bamsap ka jot ka jaidbynriew dei kane ba u drok ruh u jyllei ha ka imlang sahlang. Nga ngeit ba kan wan ka jingkylla ha u 2023”, u la ong.