Nongstoiñ, Nohprah, 30: Katkum ka khubor na ki pulit ka West Khasi Hills, la ïathuh ba uwei u rangbah ba la tip kyrteng u Phrising Kharbani na ka shnong Byrki, u la khlad noh bad la lap ïa ka met ïap jong u na kawei ka jaka khlaw kaba la tip kum ka Siarpa ha ka shnong Byrki, West Khasi Hills.
La ong ba u khun jong u Bah Phrising kata u Eslingroy Thongnibah u la pyntip sha ki pulit ba ha ka 28 tarik mynta u bnai, ha ka por 9 baje mynstep u kpa jong u, u la leit ban thohdieng ïap na katei ka jaka. Hynrei, um shym la wan phai shuh satia sha ïing haduh ka por janmiet. Kumta mar mar kiba haïing hasem ki la leit ban wad ïa u naduh ka por 5 baje janmiet. Pynban dei tad haduh ka por 10 baje mynmiet ba ki la lap ïa ka met kaba la thiah ïap ha katei ka jaka thohdieng.
Halor kane ka jingjia, na ka liang ki pulit ki la shimkam ban tohkit bad ki la pynpoi ruh ïa ka met ïap sha Civil Hospital na ka bynta ka post mortem. Hadien pat la aiti noh sha kiba haïing hasem ba kin pyndep ïa ka jingdonkam. La register ruh ïa ka case katkum ka UD case vide Nongstoiñ PS UD case No. 29/2022 bad ka jingtohkit ka dang ïaid shakhmat.
