U Bah Paul u shu kren thaw nang, um tip eiei ïa ka aiñ shapang ki nongdie madan: MGSPHSVA

Shillong, Naiwieng, 24: Ka Meghalaya & Greater Shillong Progressive Hawkers and Street Vendors Association (MGSPHSVA) ha ka sngi u Blei ka la pyrshah jur ïa ka jingkren jong u Myntri ka tnat Jngohkai Pyrthei ka Sorkar Jylla u Bah Paul Lyngdoh da kaba ong ba ka jingkren jong u ka long tang ka jingkren thawnang bad ka jingïalam bakla.
Kum ban shu pyntip, ha ka jingïakren bad ki lad pathai khubor ha ka sngi Saitjaiñ u Bah Paul Lyngdoh u la ong, “ba ki la don ki jingïalang kiba la shong bunsien hapoh ka jingpynïaid jong u Symbud Myntri Rangbah uba khmih ïa ka tnat Pynroi Sor Bah Sniawbhalang Dhar bad la thung ruh ïa ka komiti ha kaba ki nongmihkhmat jong ka seng ki nongdie madan ruh ki don. Ïa ki jingïalang la buh ha ki jingthoh bad ki la shim por shi snem kynthih. Kumta ka long ka bym don nongrim ban ong ba ym shym la kynjoh ktien ïa ki nongdie madan.
Ha u kyrwoh ba la phah sha ki lad pathai khubor, ka MGSPHSVA ka la kynthoh, “kane ka jingkren ne jingpynshai jong u Bah Paul Lyngdoh, u Myntri ka Sorkar Jylla ka dei kaba shu thaw nang bad ka pynpaw shai ba um tip ei ei shaphang ka aiñ jong ki nongdie madan.”
Ka seng ki nongdie madan ka kren da kaba shai ba kam shym ïadon bynta ha kita ki jingïalang ban pyrkhat ban pynkynriah ïa ki nongdie madan na Khyndai Lad.
“Ka seng ka ngeit skhem ba dei tang ka aiñ “The Street Vendors (Protection and Regulation of Street Vending) Act 2014’ ba ka dei ka Aiñ kaba shong nia kaba lah ban pynbeit ïa ki kam jong ki nongdie madan. Dei halor ki kyndon jong kane ka Aiñ ba ka seng ki nongdie madan ka la ïashim bynta ha ka In-situ survey kaba la pynlong da ka Provisional Town Vending Committee. Dei tat haduh ba la pyndep ïa ki kam baroh katkum ki kyndon jong ka Aiñ bad ba la ai ïa ki syrnot ha ki nongdie madan yn sa lah ban thaw ïa ka Town Vending Committee kaba pura ha kaba 40 ngut ki dkhot ki dei ban long napdeng ki nongdie madan. Dei kane ka TVC kaba don ïa ka hok ban thaw ïa ki Vending Plan, ban kdew ïa ki jaka ban shong ki nongdie madan, ka por ba kin shong die jingdie, ban pyrkhat ban pynkynriah ïa ki bad kumta ter ter,” la ong ka MGSPHSVA.
“U Myntri ka Sorkar Jylla u dei ban tip ba ki iew kiba la rim bad ki iew kiba shu long hi kum ka Khyndai lad, Iewduh, Bimola, Laitumkhrah, Rynjah bad kiwei de ki dei ki jaka kiba yn ym don ba lah ban khang ïa ki nongdie madan ban shong die jingdie. Ka por ka ladei ba ki lad pathai khubor kin pynpaw pyrthei ïa ka jingbieij jong u Myntri Sorkar uba la shu kren thawnang bad ïalam bakla ïa ki paidbah halor ki kam ba ïadei bad ki nongdie madan,” la kynthoh ka MGSPHSVA.
Ka Meghalaya & Greater Shillong Progressive Hawkers and Street Vendors Association ka dei ka seng jong ki nongdie madan kaba heh duh bad ki dkhot jong ka kiba dei ki nongdie madan ki dei kiba noh synniang shibun sha ka ïoh ka kot jong ka Jylla bad kiba kyrshan ïa kiwei ki nongtrei nongbylla kiba duna jingïoh. Kumta ka jingpyrshang ban kyndang jubor bad kyndang be-aiñ ïa ki nongdie madan kan ktah jur ïa ka ïoh ka kot jong ka Sor Shillong.
Ka MGSPHSVA ka wer ïa u Bah Paul Lyngdoh bad ïa kiwei de ki heh sorkar sha ka jingai jinghikai kaba kyrpang ban ai jingtip bad jinghikai ïa ki shaphang ka aiñ, ‘The Street Vendors (Protection of Livelihood and Regulation of Street Vending) Act 2014’ bad kiwei ki jingtip ha ki kam pynroi bad pynitynnad ïa ka Sor.