Dap 100 snem ka St. Cecilia Choir ka kynhun rwai ba la rim tam ha Shillong Archdiocese

Shillong, Naiwieng, 24: Ka kynhun rwai ba la rim tam ha ka Jylla Niam Bah Shillong ka St. Cecilia Choir ka la rakhe ïa u mawmer ba Shispah snem naduh ba la seng ïa ka ha u snem 1924 da u Sohblei Elias Hopewell Elias Khariong, Sohliya uba dei u ruh Lyngdoh Sohblei banyngkong napdeng ki Khasi.
La rakhe ïa ka jingdap 100 snem jong ka St Cecilia Choir da ka Mass Bakhuid ba la pynmynta da u Bishop ka Jyllaniam Nongstoiñ u Rt. Rev. Wilbert Marweiñ ha Iingmanebah Laitumkhrah ryngkat ka jingsynran lang jong u Parish Priest ka Cathedral Parish, Laitumkhrah u Sohblei Bernard Laloo, u u Sohblei Robert Majaw, u Parish Priest jong ka Parish Jowai u Sohblei Hilarius Lamare bad kiwei ki Lyngdoh Sohblei.
Ha ka Mass Bakhuid ka St. Cecilia Choir ka rwai pynrhem mynsiem da ka jingïashim bynta lang jong ki paid u Blei.
Hadien ka Mass Bakhuid u Bishop Wilbert Marweiñ u la pyllait paidbah ïa ka kot sah kynmaw tympang bad ka jinglehburom.
Haba kyrtiang dien sha ka mynnor ka St. Cecilia Choir ka dei ka kynhun rwai banyngkong eh jong ka Balang Katholik hapoh ka Shillong Archdiocese. La seng ha u snem 1924 ha u Lum Tyngkong (kaba don mynta ka Ingmane Bah bad ka Grotto). Ïa kane ka kynhun rwai la seng hapoh ka jingïalam jong u samla H.Elias Khariong ryngkat bad u Bah Leonidas bad kiwei kiwei. Ka Cecilia Bakhuid kaba ruh dei ka nongda jong ki nongput nongtem ka long ruh ka nongda jong ka St. Cecilia Choir.
Ka jingsdang ïa ka Choir ka la long hadien ka jingsdang ka Jingisyllok Salesian ïa ka mision ha kane ka Jyllaniam ha u snem 1922 ha kaba u Most Rev. Louis Mathias SDB, DD u la long u nongsharai mynsiem jong ka Jyllaniam.
Ha u snem 1948 u Parish Priest jong ka Iingmane Bah u dei u Fr. Foglia bad u Choir Master u dei u Bah Severine Wilfred Nongkhlaw bad u Bah Cyril D. Lyngdoh bad u Bah Martin Khongwir.
Ha ki snem 1950 ter ter haduh u 1981 ki Choir Master ki long u Fr. Tarsisius Resto Phanrang (bam kwai ha dwar u Blei), u Fr. Robert Majaw uba la shimti ban pynïaid naduh u snem 1982 haduh u snem 1984 naduh u 1989 haduh 2013 u Bah Polycarpus Ksoo (bam kwai ha dwar u Blei) bad mynta la shimti da u samla Damien Jeffrey Jyrwa naduh u 2017.
Ka St. Cecilia Choir ka dang don ki riewdkhot barim naduh u snem 1958 kiba dangim haduh mynta.
Ha u snem 1990 ha ka jingrakhe ïa ka jingdap 100 snem ka jingwan jong ka jingngeit Catholik ha Ri lum Khasi bad Jaiñtia ïa ka St Cecilia Choir la pynim biang ha ka 15 tarik u Naitung.
Kumta ha ka 9 tarik, Naiwieng ha ka jingpynkut ïa ka jingrakhe 100 snem jong ka Choir, ka St. Cecilia Choir ka la rwai ha ka Proseshon Bah Iukharist. Kane ka kynhun rwai ka la ju ïashim bynta ban leit rwai kylleng ka thaiñ Shatei Lammihngi kum ha Arunachal kata ha u snem 1992, ha ka Centanary Tyrna, ha Pynursla bad kiwei ki jaka bad ha ri Bangladesh ha Dhaka.
Dang 10 snem mynshuwa ka St. Cecilia Choir ka la rakhe ïa ka jingdap 90 snem ha ka 22 tarik, Naiwieng 2015 ha Iingmane Bah
Mynta kane ka kynhun rwai ka la kiew stet da ka jingdon jong ka shlem jinghikai ïa ki khynnah rit hapoh ka jingïalam jong u President u Bah M.D Tmar bad u Choir Master u samla Damian J Jyrwa bad u Spiritual Director u Sohblei Bernard Laloo.
La pynkut noh ïa ka jingrakhe 100 snem ha ka sngi u Blei da ka jingpynhiar lama da u Archbishop Victor Lyngdoh.