Shillong, Naiwieng, 24: Ka Synjuk ki Seng Samla Shnong Pynthorumkhrah Pyllun (SSSSPP) ha ka sngi Saitjaiñ ka la dawa ïa ka Shillong Golf Club Limited (SGCL) ban weng noh mardor ïa ka jingker be-aiñ bad ban ym buh ka jingpyrkhing na ka bynta ban rung sha ka Madan Saw.
Ha ka dorkhas ba la aiti sha u Director jong ka Shillong Golf Club Limited, ka SSSS Pynthorumkhrah Pyllun kaba long ka kynhun ki seng samla jong ki saw tylli ki shnong ba kynthup ïa ka Lumshyiap, Golflinks, Pynthorbah bad Langkyrding Mihngi bad ka Seng Samla Mawlai Mawroh ki la aipor tang shi taiew ban pynurlong ïa ka jingdawa hynrei lym kumta ki la byrngem ban shim da kiwei pat ki sienjam ban ïada ïa ka hok jong ki nongshong shnong.
“Ka SSSSPP ka pynpaw ïa ka jingpyrshah kaba jur halor ka jingtei be-aiñ ïa ka jingker bad ka jingkhang lad ïa ka Madan Saw, kaba long ka jaka ïalehkai ba la shna da ka Assam Rifles bad ba la plie paidbah da u Myntri Rangbah barim u Dr. DD Lapang da ka jingkyrshan lang jong u MLA ka Pynthorumkhrah u Bah Alexander L. Hek bad ka Shillong Golf Club Limited ha ka 28 tarik, Risaw, 2005,” la ong ka dorkhas ba la soi da u Chirman ka SSSSPP ka Khrawpyrkhat Mynsong, u Secretary Manchwakimi Kso bad u President ka Seng Samla Mawlai Mawroh u Jyswil K.R Lyngdoh Nongpiur.
Ka SSSS ka la pyni sabut ruh ïa kane da kaba suh lang ha ka dorkhas ïa u mawnongrim ba la plie paidbah ha ka 28 tarik, Risaw, 2005.
Ïa ka Madan Saw kaba don ha syndah jong ka jaka tied Golf la shna khnang na ka bynta ka jingmyntoi jong ki saw tylli ki shnong, kata, ka shnong Lumshyiap Golflinks, Pynthorbah ka Seng Samla Mawlai Mawroh ha kaba ka la long ka jaka ba la pyndonkam na ka bynta ki jingïalehkai sports, ki nongshong shnong, ki kynhun niam bad kiwei kiwei jait kam khlem kano kano ka jingshim pisa. Hynrei, mynta ïa kane ka madan la ker bad la pyrkhing wat ban rung shapoh. Nalor kata, la buh sa ka khyrdop khrong pisa, kaba la khanglad ïa ki paidbah jong ki saw tylli ki shnong ban pyndonkam ïa ka madan.
“Ngi pyrshah jur ïa kane ka jingpyrkhing ban rung sha ki jaka paidbah ïa kaba ym shym la thmu ban pynlong jaka shimet ne ban khrong pisa. Ka jingpyrkhing ban pyndonkam ïa ka madan ym tang ba ka pynkheiñ ïa ka jingthmu ba la shna kyrpang ïa ka madan hynrei ka pynduhnong ruh wat ïa ki samla shnong, ki skul, ki nongshong shnong bad ki kynhun niam ban pyndonkam na ka bynta kino kino ki jingthmu,” la ong ka SSSS ha ka dorkhas.
“Katkum kitei ki daw ba la kdew hangne, ngi dawa ba adei ban pynkynriah noh mardor ïa ka khyrdop khrong pisa bad ban weng ïa lut ïa baroh ki jingpyrkhing kaba ïadei bad ka Madan Saw. Ngi kyrpad ruh ba ïa ka madan ïalehkai dei ban aiti da ka rukom kaba dei sha ki nongpeit jong ki saw tylli ki shnong jong ka Lumshyiap, Golflinks, Pynthorbah bad Mawlai Mawroh da ka jingthoh, khnang ban pynthikna ba kan ym shuh kano kano ka jyrwit jyrwat ne ka jingpyrkhing hadien habud,” la bynrap ka dorkhas.
