Shillong, Naiwieng, 23: Ka Ranikor Constituency Development Committee (RCDC) ha ka sngi Saitjaiñ ka la pynshlur da kaba ai khusnam ïa ki samla pule bad ïa ki nongïalehkai sports kiba long ki nongshong shnong hapoh ka jylli jong ka Ranikor Constituency ba kin nang ïai trei shitom shuh shuh ha ka jingïaid lynti jong ki khnang ba kin dup kynjoh sha ki mawjam jong ka nam.
Ha ka jingïalang pynkup burom kaba la long ophis treikam jong ka UDP ha nongbah Shillong ki don 71 ngut ki samla pule kiba pas bha ha ka kyrdan Master Degree, Bachelor Degree, HSSLC bad SSLC kiba la ïoh pdiang ïa ka khusnam da ka song pisa bad da ka jingthoh buh sah jingkynmaw.
Ïa ki khusnam, la sam da u Myntri ka Sorkar Jylla u Bah Paul Lyngdoh uba la long kum u Kongsan ryngkat ka jingdonlang jong u MLA ka Ranikor Constituency u Bah Pius Marwein uba la long kum u symbud Kongsan, u Bah GG Bung Snaitang, u Bah Bahunlang Sanglein, ki samla pule bad ki kmie ki kpa.
Nalor ki samla pule, ka Committee ka la ai khusnam ruh ïa ki 19 ngut ki nongïalehkai sports kiba la wanrah burom ïa ka jylla Meghalaya bad hapoh ka South West Khasi Hills District.
Haba kren kum u Kongsan u Bah Paul u la pynkynmaw ïa ki samla pule bad ïa ki nongïalehkai sports ba kin bud ïa ki nuksa jong ki riewkhraw jong ka pyrthei kiba la trei shitom haduh ba kin da poi sha ka thong ban ïoh ïa ka jingithuh na ka imlang ka sahlang bad ban pynsah nam sah kyrteng ïalade wat hadien ba ki la khladnoh na kane ka sla pyrthei.
U la ong ruh ba ka lynti ïaid ban poi sha ki kliar jong ka nam ka dei ka jinglen lade bad ka jingtrei shitom kaba wanrah ïa u soh uba thiang.
U Bah Pius haba kren kum u symbud Kongsan u la ong ba ka ka jingpynlong ïa kane ka jingpynkup burom ha nongbah Shillong ka long namarba bun na ki samla pule jong ka Ranikor Constituency ki dei kiba shong ba sah ha nongbah Shillong.
U la pynshlur shuh shuh ïa ki samla pule ba kin nang ïai minot ha ka jingpule kot khnang ba ka Ranikor Constituency kan nang sei shuh shuh ïa ki nongshong shnong kiba la nang la stad kiba lah ban long ki nongïalam ha ka shnong ka thaw bad ha ki kyrdan bapher bapher.
