Ki nongdie madan lane ki ‘street vendors; kumba ong da ka ktien nongwei ki don ka hok ban ïadie ïathied ïa ki mar ki mata jong ki. Khlem pep ka jingbun jong ki nongdie madan ka kdew ba ki briew kim don lad ban ïohkam ïohjam da kiwei pat kumta kim banse ban pyrshang ban ïadie ïathied ha lynti syngkien bad kat haba kham bun kiba ïaid ba ïeng. Dei na kata ka daw ba ka Khyndai Lad (Police Bazar) bad ter ter haduh ban da poi Ïewduh ki dei ki jaka kiba thnem tam ha ka ïadie ïathied harud surok. Ym dei tang hangne ha sor Shillong ba ngi ïohi ïa kane ka jingïadie ïathied harud surok. Lada leit sha kano kano ka bynta jong ka ri India ruh ngi ïohi hi ïa ki nongdie harud surok. Ka jingïapher ka long tang ba ki surok jong ngi hangne ha sor Shillong ki khim palat. Bad ki nongdie surok bunsien ki knieh noh ïa ka lynti ïaid kjat (footpath) jong ngi ki paidbah. ïa kita ki lynti ïaid kjat la shna khnang ba ki briew kiba ïaid kjat kin lah ban ïaid khlem da sheptieng ïoh shah tylliat kali. Kane ka long kaba donkam eh na ka bynta kito kiba hap ïaid kjat ban beh kam beh jam bad ban leit skul/kolej lane ban beh trei ruh. Ym baroh ki briew ha sor Shillong ki don la ka jong ka kali saw sha ka lane ar shaka. Dangbun bah ki briew ki dang ïaid kjat khamtam haba kyrkieh kam ban haba ki kwah kiar na ka shah dheng kali.
Namar kata ka jingknieh noh ïa kita ki lynti ïaid kjat (footpath) kumba long ha Civil Hospital bad ha Laitumkhrah ka long ka jingïuhroit ïa ka hok jong kiba hap ïaid kjat bad khamtam leilei kiba anna ka met kum kiba matlah lane kiba lah kham tymmen kiba donkam ban ïaid suki. Tang na ka daw ba ki nongdie madan ki die ïa ki mar jong ki ha kine ki lynti ïaid kjat, ki knieh noh ïa ka hok jong kiba ïaid kjat. Hato kane ka long kaba dei mo?.
Man ba don ka jingïakren halor kane ka phang, kito kiba kyrshan ïa ki nongdie madan (street vendors) ki pynksan nia da kaba ong ba ka jingïadie ïathied ka long kawei na ki lad ïohkam ïohjam bad ba kita kiba nongdie madan ki don la ka hok. Ka jingkylli ka long- hato kiba ïaid kjat kim don hok mo?. Hato kiba ïaid kjat kin hap ïaid noh na ka surok ïaid kali? Lada jia ba shah lymbub kali mano ban kitkhlieh? Hato kita ki nongdie madan kin siew bai hospital ma ki?.
Kumba ju long ha kane ka jylla jong ngi, ki nongdie jingdie kiba bun, kynthup ïa kito kiba die madan ki dei ki ki longkmie bad ki samla kynthei. Ka jingduk ka ban khia bad ka ñiat ïa ki shane sha sor Shillong ban wan wad ja kpoh. Man ba nga thied jhur na ki nga ju kylli, “Phi sah shaei Kong?” Ka jubab jan barabor ka long, “na Smit” lane “na Nongkrem” na Mawpat bad kumta ter ter. Ki nongdie madan hi bun kiba nabar ka sor Shillong. Ka jingduk ka pynbor ïa ki ba kin wan die la ki jingdie katba ïohei bad lehse ha ka shi sngi kim ïoh nong palat ïa ka 500 spah tyngka eiei. Kata ka ïarap ïa ki ban thied khaw bad kiwei kiwei de ki jong donkam ha ïing. Ki trei shitom haduh katta katta bad ki shah ïa u slap bad ka lyer, ka jingshit bad ka jingkhriat khlem da khñium. Hooid ngi don ka jingsngewkhia na ka bynta jong ki, hynrei katkum ka aiñ te kim lah keiñ ban ïadie ïathied ha ka lynti ïaid kjat ki paidbah.
Mynta ka sorkar ka la pyrshang ban pynkynriah noh ïa ki nongdie madan na Khyndailad sha kawei pat ka jaka hynrei kito kiba kyrshan ïa ki, ki la pyneh bad ong ba kin ym khih satia na ka jaka kaba ki la ju shong ïadie ïathied. Haba kumta ngin leh kumno?. Lada ka sorkar kam ai jaka da kawei pat ïa ki nongdie madan, ki kynnoh ba ka sorkar kam kheiñ kor ïa ki. Mynta pat haba ka sorkar ka la sdang ban wad jaka shawei pat ba kin ïadie ïa ki jingdie jong ki, ki la sdang sa ban pyneh bad da kaba ong artad ba kin ym kynriah satia na ka jaka kaba ki ju die. Hato ka kham khia ka hok ki nongdie madan ne ka jong ki nongïaid lynti? Mano ban thew tarajur ïa kane laitnoh ka ïingshari?.
Ka sor Shillong baroh kawei ka la bun briew palat. Ki surok bad ki lynti rit ruh ki la khapngiah lut tang da ki kali suda. Nangta ka jingdheng kali ruh ka dei kawei ka jingjynjar kaba pynsohsat haduh katta katta ïa ki paidbah kiba beh kam beh jam. Don kiba kloi ban ïaid kjat hynrei lada ïalam leilei bad ki khunlung i sheptieng pynban ïoh shah tyllait kali namar ha kiba bun ki jaka ym don lynti ïaid kjat satia. Kum ban shu pyni nuksa ka Nongrim Hills ka dei kawei na ki jaka ha kaba ym don lynti ïaid kjat naduh na Bethany Hospital haduh ophis NEC. Balei keiñ ba ym don ba pyrkhat lem na ka bynta kiba bun ki paidbah kiba ïaid kjat? Bad lada lah shna ïa kita ki jaka ïaid kjat hato ka long mo ban knieh noh ïa ki da ki nongdie madan?.
Haba ka sorkar ka la pyrshang ban pynkynriah noh ïa ki nongdie madan shawei pat balei keiñ ki pyn-eh bad ïa pyni reng pynban. Ha kiwei ki ri ka pyrthei haba ka biang ka rukom pynïaid, ki nongdie madan ki don la ka jong ka jaka bad ki briew ki da leit khnang sha kita ki jaka ban leit theid jingthied. Ki ju khot ïa ki, ki “flea market.” Balei keiñ hangne ha sor Shillong pat ki nongdie madan ki kwah ban kyntur sha Khyndailad kaba la khapngiah lypa bad ïatyngkhuh para briew?.
Ngi dei ki nongshong shnong ka ri synshar paidbah bad ngi donkam ban ïapyrkhat lang na ka bynta ka ban ïabhalang baroh, ym ban ïohnong lane ban duhnong mano mano ruh. Khlem da ïa pyrkhat lem markylliang ngin sa poi sha ka jingïathut bad ïa sngewsih para ma ngi.
