Shillong, Naiwieng 24 : U MLA ka Jowai, Bah Wailadmiki Shylla ba dei ruh u President jong ka National People’s Youth Front (NPYF), u la ong ba ha kane ka juk mynta imat bun ki la sngewthuh bakla da kaba shim ba kito kiba ieid Jaidbynriew shisha dei tang kito kiba shu ai jingkren.
“Katkum ka jingsngewthuh jongnga haba nga ieid ïa ka Jaidbynriew lajong kamut nga ieid ïa ka riti dustur bad nga wanrah ïa ki kam pynroi ban pynsuk ïa u para jaidbynriew lajong, ki lad ïohkam ïohjam, ban pynsuk ïa ki ha ki lynti syngkien, ki skul ki jaka sumar. Kita ki dei ki jingtip jongnga haba kren shaphang ka jingieid Jaidbynriew,” u la ong haba kren bad ki lad pathai khubor dang shen.
Tangba,u ong pat ba um tip shuh ha kane ka juk kaba mynta ki paidbah ki pyrkhat kumno. “Don kiba sngewthuh bakla ba ka jingieid Jaidbynriew kadei tang da kaba kren. Lada ong ba ieid Jaidbynriew tang da kaba shu kren kata ngi ruh ngi lah hi ban shu kren,tangba ngim kwah ban shu pynbiej ïa ki paidbah, hynrei ngi kwah ban pyni da ka kam ban wad lad wad lynti ba kyntiew ïa ka Jaidbynriew lajong,” u la bynrap biang.
Shuh shuh u ong ruh ba ka Jaidbynriew kan kiew tang lada ki kiew ha ka jingnang jingtip, ki kiew ha ka kamai kajih bad ruh ha ka jingïaburom ha ka imlang sahlang.
Une u heh ka NPP u la ong ruh ba ka long kaba sngewsih ban ïohi ba bun mynta ki ong ba ka jingieid Jaidbynriew ka dei tang kaba shu kren khlem ki kam.
“Nga te ngam ïahap namar nga shim ba lada ieid Jaidbynriew dei ban trei bad pyni lyngba ki kam,” bynrap biang u Bah Wailadmiki Shylla.
