Ym don MLA shuh ka Congress na rilum Garo, sah sa tang u Bah Ronnie na rilum Khasi

Shillong, Naiwieng 24 : Ka jingbym lah jong ka Congress ban jop ïa ka elekshon shiteng samoi kaba dang shu dep shen ha Gambegre ka la pynlong mynta ïa kane ka party ban sah sa tang uwei u MLA ha ka Ïing Dorbar kaba don 60 ngut ki dkhot.
Lah ban kdew hangne, ka Congress ka la jied da u Jingjang M Marak ban ïakhun ïa ka elekshon shiteng samoi ha Gambegre kaba long ha ka 13tarik u Naiwieng hadien ba u MLA jong ka party na katei ka constituency, u Saleng A Sangma u la shah jied noh kum u MP ba thymmai ka Tura.
Hynrei ha ka jingniew vote kaba long ha ka 23tarik mynta u bnai, u kyrtong ka Congress u la poi sha ka kyrdan kaba lai hadien ba ka kyrtong ka NPP, ka Dr. Mehtab Chandee A Sangma ka la ïoh ban jop donburom da kaba tam haduh 4594 vote ïa ka kyrtong jong ka TMC ka Sadhiarani M Sangma kaba wan ha ka kyrdan kaba ar.
Kumba long mynta hi, ka Congress ka don sa tang u MLA ka Mylliem, Bah Ronnie V Lyngdoh uba dei ruh ha kajuh ka por u MDC ha KHADC.
Haba ïoh ban ïa kren bad uwei na ki heh Congress u la ong ba ka elekshon hi bunsien ka shong eh ha ka jingïadei hapdeng ki kyrtong bad u paidbah. “Lehse lada ïakhun hi da u Saleng ka lah ban long da kumwei. Kata kadei ka jinglong jong ki paidbah namar khatduh hi kadei ka jingïadei,” u la ong.
Da ka jingjop jong ka Dr. Mehtab Chandee, ka NPP ka la ïoh mynta ban nang pynkhlaiñ shuh shuh ïa ka ktem jong ka ha rilum Garo namar na ki 24 tylli ki constituency ka la ïoh ban don haduh 19 ngut ki MLA kiba dei na ka party. Katba ïa ki 5 tylli ki constituency la mihkhmat da ki MLA jong ka TMC bad MLA shimet.
Haba phai pat sha rilum Khasi, ka NPP hadien ka jingwan pynïasoh jong ki lai ngut ki MLA na ka Congress ka la ïoh ban don haduh 13 ngut na ki 36 constituency. Ha kine ki 23 tylli kiwei pat ki consituency la mihkhmat da ki 12 ngut ki MLA na ka UDP, 4 ngut na ka VPP, mar arngut na ka HSPDP bad BJP bad mar uwei u MLA na ka TMC, Congress bad uwei u MLA shimet.
Na ka liang ka MLA thymmai jong ka Gambegre haba kren bad ki lad pathai khubor ka la ong, “ Kadei ka khubor kaba jam bad kaba shai ba ki paidbah ki kwah ïa ka jingkylla mynta bad ki la jied ruh na bynta ka roi ka pa kaba dei ka thong treikam jong ka party.”
Shuh shuh ka ong ruh ba ka dap da ka jingkmen kaba khraw ba mynta ka kynti ki la ïoh ban khur ïa ka jingjop na katei ka constituency kaba kim ju lah mynno mynno ruh.
“Baroh shi katta ngim ju lah ban jop na kane ka constituency hynrei nga sngew kmen ba mynta ka sngi ki paidbah ka Gambegre ki la phai khmat sha ka party jongngi bad vote na bynta ka jingkylla,” ka la bynrap biang.
“Ka rilum Garo bad kumjuh ka Jylla baroh kawei ka la sakhi ïa kane ka jingkylla kaba ïaid mynta ryngkat ryngkat bad ka sorkar ba lamkhmat da ka NPP. Kumta ngi kyrmen ba ngin nang lah ban leh khambun shuh shuh ki kam bad kham bha khnang ba ngin lah ban ai ka jingshakri kaba kham janai sha ki paidbah,” bynrap biang ka Dr. Mehtab.
Mynta ka samoi, ka Ïing Dorbar Thawain ka Jylla ka la don haduh saw ngut ki longkmie kiba long MLA, kata ka MLA jong ka Shillong East, Dr. Ampareen Lyngdoh kaba dei ruh ka Myntri Sorkar ka jylla, nangta ka MLA jong ka Sutnga Saipung ka Santa Mary Shylla, ka Miani D Shira na Ampati bad mynta sa ka Dr. Mehtab Chandee Sangma. Lai ngut na kine ki dei na ka NPP katba ka Miani pat ka jop na ka TMC.