(Bah Albert Maring, Umdap Dumu, Ri-Bhoi)
U Bah Mayral Born Syiem u la jop bad long MLA la arsien kynthih mynta na ka Nongpoh Constituency naduh u snem 2018 na ka seng Indian National Congress, kata hadien ba u Dr D D Lapang MLA bad Myntri Rangbah barim ka jylla u la shongthait noh khlem ïaleh shuh ïa ka election MLA 2018, na ka daw ka jinglong tymmen ha ka jingnoh ka rta. Kumta u la pynmih bujli noh ha ka jaka jong u da u bah Mayral Born Syiem uba dei u wei na ki nongkyrshan ba radbah jong u Dr DD Lapang na ka seng Congress ha Nongpoh. Nangta ha ka sien kaba ar pat kata ha u snem 2023 u la ieng ban ïaleh na ka seng United Democratic Party (UDP) bad u la jop biang.
Kum u nongmihkhmat, u la pyrshang ban wanrah ki kam pynroi hapoh ka constituency na ka bynta ka jingbit jingbiang jong ki paidbah, u la pyrshang ban ai ka jingshakri ïa ki paidbah ha ki bynta bapher bapher la ki dei kiba kyrshan ne ki bym kyrshan ruh kumjuh. U bah Mayral Born Syiem u dei u wei na ki nongmih khmat MLA ba ju paw khmat bha hapoh ka iing Dorbar thaw ain (Assembly) ka jylla uba ju shim bynta ha ka jingïatai ïathir ban kren halor ki mat ki jura (issues) bapher bapher na ka bynta ki paidbah ka dong ka thain, ka Constituency bad ka jylla.
U long u briew uba kloi ban pdiang bad sngap ïa ki jingeh, ki jingdonkam jong ki paidbah, ha kino kino ki kam ne bynta ba ki paidbah ki leit ban pynsngew bad kyrpad, bad uba kloi ban kner ki jingïarap katba lah, watla um lah ban ïarap lut ïa baroh ha ka juh ka por, hynrei ka long kaba sngewtynnad ïa ka jinglong jong une u rangbah kata ka long ba um ju pynphai thylli ïa kiba leit ban kyrpad bad pynsngew ïa ki jingeh ki jingdonkam ha u, ïa kaba u lah ban ïarap u leh ïa kata.
Watla ki don katto katne kiba kynthoh pyrshah ïa une u rangbah, ha ka kam shakri paidbah kam dei kaba suk ban pynsngewbha lut bad ïarap lut ïa baroh ha ka juh ka por, ym lah pat ban len ha ka jinglong briew ka don ka jingtlot bad ka jingduna kaba hangne hangtai, hynrei ha kaba kut hi ka mon kaba jwat ka shong ha u rangbah.
Kumba lah ban sngewthuh na ka sur jong ki paidbah babun balang hi ha Nongpoh Constituency ki paidbah ki dang ai ka jingkyrshan bad ka jingshaniah kaba pura ha u bah Mayral Born Syiem watla u ieng ban ïaleh na kano kano ka seng sainpyrthei (Political Party) bad u don ka jingkyrmen kaba skhem khlem artatien ban jop bad wan phai biang kum u MLA ha ka election 2028 sha ka iing Dorbar thawaiñ ka jylla, namar u long u briew uba ki paidbah ki lah ban ïa kren bad kynduh ha kano kano ka por ba ki paidbah ki donkam, bad u long u ba kloi ban don bad ki paidbah ban ïarap ha kino kino ki bynta ha ka jingshakri paidbah kum u nongmihkhmat ba ki paidbah ki shaniah.