U Bah Mandaraïan Shangdiar kum ka nuksa jong ka jingtrei shitom ryngkat ka sap ba u don

Mawkyrwat, Ïaïong 21: “Kumba ong ka kyntien, haba don ka mon ym don jingeh lada ngi kwah ban pyntyllun ïa kino kino ki kam,” kane ka jingong bad jingpaw ha ka jingim jong uwei u rangbah na shnong Tynnai, South West Khasi Hills District, u Bah Mandaraïan Shangdiar, uba la long shisha ka nuksa kaba bha.
Ka jingïaid lynti jong u Bah Mandaraïan Shangdiar kum u nongtrei kti ka la pynlong ïa u nongthoh khubor ban leit ïakynduh kyrpang ïa u ha ïing sah jong u, ban pynpaw sha ka pyrthei ïa ka jinglah jong u kum ka nuksa ïa kiwei pat ki para briew, ba wat hapdeng ka jingdon jingduna ha ka met, hynrei lada don ka mon bad ka jingïai trei shitom, lah ban poi sha ka jingïaid lynti kaba jop.
Lah ban kdew ruh ba u Bah Mandaraïan Shangdiar u la duhnoh ïa kawei ka kjat shiliang naduh u snem 2022 na ka daw ka jingpang, hynrei ha kaba ïa dei bad kane kam trei kti jong u kam shym la pynlong ïa u ban pynduh jingkyrmen ne sangeh noh na ka jingtrei jong u. “Da ka jingthrang bad ka jingieid ïa ka kam, nga la ïai bteng ban trei shitom ban pynbiang ïa ka ïing ka sem jong u”, ong u bah Mandaraïan Shangdiar.
Ha ka jingïakren bad une u rangbah, u la pynpaw ruh ba manla ka sngi, u trei ha ka kam shna tiar thaiñ bad ka kam furniture. Wat hapdeng ka jingduna ha ka dkhot met ruh u la lah ban shna bad pynwandur ïa ki bun jait ki jingbuh ban pynitynnad ïa ka ïing ka sem kum ki knup rit, ki ksing, ki dhah, ki syntiew, ki skut bad kiwei kiwei. Ym tang katta, u shna ruh ïa ki shuki, ki duli bad ki ksing ngap bad shibun kiwei de ki tiar kiba kynthup ha ka kam handicrafts bad furniture.
Ha kajuh ka por, u Bah Mandaraïan Shangdiar u pynpaw ïa ka jingkwah jong u ba ka sorkar kan phai khmat lem ban ai jingïarap ha kiba kum kine ki kam, khnang ban pynheh shuh shuh ïa ka kam jong u. U don ruh ka jingkyrmen ba lyngba kane, ka kam kam dei tang ba un pynbiang tang ïa lade, hynrei un lah ruh ban ai lad ha ka kamai kajih ïa kiwei de ki briew ha shnong Tynnai bad ki shnong ba marjan.
Ban shu pynkynmaw, ka shnong Tynnai, ka dei ka shnong kaba jngai tang kumba 9 km eiei na Mawkyrwat, bad ka la long kawei na ki shnong kaba pawnam ha ka jingpynmih ïa ki tiar thaiñ kti (handicrafts). Lah ban ong ruh ba ki nongshong shnong ki la ïoh ruh ban leit ïashimbynta ha ki jingïashimbynta bapher bapher hapoh ka jylla bad shaduh sha kiwei pat ki jylla jong ka ri India.