U Bah Bindo Lanong u kyrtong uba nyngkong eh ban pynpaw ba u lah ban nym jop

Shillong, Rymphang, 28: U Bah Bindo M. Lanong uba ïakhun kum u kyrtong shimet na Nongkrem Constituency ha ka elekshon ba dang shu dep long ha ka Lah Sngi u Blei mynta ka taiew, u dei uba nyngkong eh ban pynpaw ba un nym lah ban jop da kaba kynnoh ba ka pisa ka la trei borbah ha kane ka kynti ha Nongkrem Constituency.
Ha Nongkrem Constituency ki don 38, 285 ngut ki nongthep vote, kata, 18, 076 ngut ki dei ki shynrang bad 20,209 ngut ki dei ki kynthep. Ki paidbah kiba la poi thep vote ki long 32,045, kata 14,662 ngut ki shynrang bad 17, 383 ngut ki kynthei. Ka percentage ka long 83.70%.
Ki kyrtong kiba la aireng na Nongkrem Constituency ha kane ka kynti, ki long u Bah Lambor Malngiang na ka UDP, u Bah Dasakhiatbha Lamare na ka NPP, u Bah Ardent M. Basaïamoit na ka VPP, u Bah Joannes Lamare na ka AITC, u Bah Bindo M. Lanong kum u kyrtong Shimet, u Bah David T. Kharkongor na ka BJP, u Bah Sardonik Nongkhlaw na ka INC bad u Bah Egenstar Kurkalang na ka PDF.
U Bah Bindo Lanong ha ka jingïakren bad u nongthoh khubor u la ong, “nga la ïaid ha Nongkrem la shi snem tam, nga la ïakynduh ïa ki Rangbah Shnong, ki riewpaidbah shynrang bad kynthei, ïa ki samla nga la lum jingïalang bad nga ïohi kumba nga la jop beit. Nga la shim ïa ka ishu jong ka rep ka riang. Nga la ong ba ngan kyntiew ïa ka rep ka riang, ka ïoh ka kot, ngan kyntiew lut ïa ki bynta kiba ïadei bad ka kam ka jam jong ki. Mynta ki paidbah ha Nongkrem ki rep tang u kubi, u muli bad u phan bad nga la ai jingmut ba kin rep noh da u soh. Nga la ïalam ruh ïa ki Coach ban kin ai hikai sa ïa ka jingïalehkai phutbol ban ai jinghikai ha madan rngi Shyllong, ka jaka kaba itynnat bha.”
“Hynrei hynnin, haba la don ka jingthep vote ka rukom pyrkhat jong nga ka la kylla kynsan kynsan bad mynta nga la artatien ba ngan jop namarba kiba bun ki ap ïa ka pisa ban ïoh shi spah, ar spah ne lai spah. Ki la pynmlien eh kine ki heh spah. Na kata ka daw, ki don ki bym leit thep vote bad ki bym ieng laiñ wat ynda la jan dap ka por 4:00 baje ruh,” la kynnoh u Bah Bindo.
“Nga ïohi ba lada ki ïoh ïa ki kyrtong kiba ai pisa ngin ïoh ïa ka Sorkar kaba kumno? Ngin ym ïoh ïa ka Sorkar kaba khuid. Katto nga la leh baroh shi snem nga ïohi ba ngan ym jop,” la kren diaw u Bah Bindo uba long ruh Chief Adviser jong ka United Democratic Party uba la shah pynduh tiket ha la ka jong ka party kaba la ai tiket sha u Sitting MLA u Bah Lambor Malngiang uba la jop kum u kyrtong shimet ha ka elekshon 2018.
“Lada wan da kiwei pat ki Nongmihkhmat ki bym ïarap ïa ki paidbah haduh mynta ki la nang duk. Napdeng ka kynhun ki riewstad bad ki riewshemphang ba ki shu ïa sngap kan ym long. Ka jingkylla ka dei ban wan bad ki paidbah ki dei ban sngewthuh ïa ka bynta jong ki kumno ban wanrah ïa ka Sorkar kaba khuid kaba suba bad kim dei ban ap ïa ka pisa. Lada ki ap ïa ka pisa kane ka pyrthei ka la kut. Ka jaidbyreiw tipbriew tip blei ha ine i shi spah bad ar spah kan pynpulom lut ïa ki jingthmu babha,” la ong u Bah Bindo.
Haba kylli, u la ong, “nga kyndit shibun ban ïohi ïa ka jinglong briew bym itynnat. Don katto katne na ki nongsynshar shnong kum ki Rangbah Shnong ki bym ngop ha ka bor jong ka pisa hynrei don pat ki katto katne ngut ki Rangbah shnong bad ki Rangbah Dong kiba ju don bad nga haduh u bnai Kyllalyngkot, hynrei tang shu mih u bnai Rymphang ma ki ruh ki kylla,” bad bynrap, “nga la i shyrkhei bad nga la shaiong.”
“Nga la ïohi da la ki khmat bad ki briew jong nga ruh ki ïohi ïa kita ki jingjia,” la kynnoh u Bah Bindo ba ka don ka jingsam pisa sha ki nongthep vote.
“Kiba bha bad ki riewsngewthuh ruh ki dang bun. Hynrei ka kynhun ki paidbah la bun kiba ngop ha ka pisa. Ki don katto katne ngut ruh ki Rangbah Balang kiba la ngat kumjuh ha kane ka bih khmihlynti ha ka pisa. Ki don kiba la nga la ai jingïarap ïa ki bad mar ïa ïoh jingïarap na nga, ngam ïohi shuh ïa ka dur ka dar jong ki,” la kynnoh shuh shuh u Bah Bindo.
“Kiba bun ki klob ïalehkai phutbol kiba nga la ïarap na ki shnong bapher bapher ban ai bol, ai jersey bad ai pisa kum ka khusnam ban ai sha ki lympung ïalehkai, wat kawei ka klob ruh kam wan mih. Shano shuh phin shahniah. Nga la shahïong bad nga la lynngoh hi ngaiñ,” la kynnoh shuh shuh u Bah Bindo.