Shillong, Rymphang 28: Hadien ka jingïathep vote kaba la long hynnin ka sngi bad katkum ki Exit Poll ne ka jingtwad jingmut da ki ‘National News Channel’ ka pynpaw ba ka Meghalaya kan ïoh ïa ka sorkar synrop ha kane ka samoi kaba mynta, kiba bun ki paidbah ki la ïatai kaba kumno ka sorkar synrop lang kan wan?.
Haba twad jingmut na ki paidbah lyngba ki Youtube Channel, kiba bun hi ki pynpaw ba lada ki Seng Riewlum ki lah ban ïapoi hi sha ka thong tang para ma ki, dei ban ïatreilang tang Para Seng Riewlum. Hynrei lada kim poi pat para ma ki, ka Party kaba ki kham noh mynsiem ban ïatreilang kadei ka Seng Congress.
Katkum ka Exit Poll kaba la leh da ki National Channel ryngkat bad ki Company bapher bapher la pynpaw ba ka NPP kan dei ka Party kaban ïoh bun eh ki Seat. Nangta ka bud sa ka TMC, UDP bad Congress. Kiwei kiwei pat ki Party ki ïa ïoh hapdeng iwei haduh hynriew tylli.
Ym tip pat kaei ka jingmut jong ki Party haba ki ïohi ba ki Exit Poll ki pynpaw kumne. Haba pyrshang ban kylli na ki, ki shu ong beit ba kin ap tad haduh ka 2 tarik kaba dei ka sngi ñiew vote ba kan shai bha ïa ki. Nalorkata kiba bun hi ki pynpaw ba ka rai hi kan shong ha ki Party ryngkat ka jingïadon lang ki MLA ba dang shah jied thymmai ha ka 2 tarik.
Hynrei ki khubor ba la ïoh ka pynpaw ba mynta ka snem ruh imat ka Assam kan don bynta hakhmat bha ban thaw sorkar ha Meghalaya kumba ka la long ha u snem 2018, ha kaba u Himanta Biswa Sarma, Myntri Rangbah ka Assam u la poi nyngkong eh napdeng ki nongïalam ban leit khroh ïa ka UDP ban ïatreilang ha ka sorkar ban ïalam da ka NPP. Ki tyllong khubor ki ïathuh ba u Himanta u la sdang ban phone ïa ki katto katne tylli kiSeng Saiñpyrthei ha Meghalaya ban phah wan sha Guwahati ban ïakren ïa kane ka kam thaw sorkar ha Meghalaya ha u snem 2023.
Shuh shuh la ïohi ba ha kane ka elekshon 2023 namar ba kam shym la don ka jingïateh lok lypa laned ka alliance ha shuwa ban leit sha ka elekshon, ki Party kiba don lang ha ka sorkar MDA haduh mynta, ki la ïakhyrwit kawei ïa kawei. Ka BJPka la ther ïa ka NPP, kaUDP ruh ka lather ïa ka NPP bad ka NPP ruh kumjuh ka la ther ïa ka BJP bad ïa ka UDP. Kiwei ki Seng rit ruh ki la khyrwit lang ïa ki Seng heh kiba don lang ha ka sorkar.
Hynrei kumba ju long hi ha kane ka jylla namar ba ki Party kim ju peit than ïa ki nongrim ne ka ideology tang shu la dep ka elekshon kine kijuh kiba ïather ha ka elekshon ki lah ban ïawan ban ïatreilang ban thaw ïa ka sorkar.
Ki Seng Riewlum kum ka UDP, ka la leit sha ki paidbah da kaba pyrta ïa ka jingdonkam ban ïoh noh da u Myntri Rangbah na ki lum Khasi Jaiñtia da kaba buh ba ka UDP kan ïalam ïa ka jingsynshar ha kaba ka UDP kan sei ïa u Myntri Rangbah. Ka Congress ka don ïa u Bah Vincent H. Pala, MP ka Lok Sabha uba khlem pep lada ka Congress ka ïalam ïa ka jingsynshar u Bah Pala un don hakhmat ban long kum u Myntri Rangbah. Ka TMC ka don ïa u Dr. Mukul Sangma, Myntri Rangbah barim bad u Bah Charles Pyngrope, uba la long teng u Speaker ka Meghalaya Legislative Assembly. Ka VPP ka don ïa u Bah Ardent Basaïawmoit uba long u nongseng jong ka Party. Ka HSPDP bad PDF kim pynpaw mano ba lah ban long Myntri Rangbah. Ka BJP kum ka Party kam, shym la pynpaw eiei, lait noh na ka jingkam u Bah AL Hek hadien ba u la dep thep kyrteng ha kaba u la kam ïalade ba un long u Myntri Rangbah ka jylla. Hynrei ïa kane ka jingkam u Bah Hek, la kyntait noh da uweu pat u MLA jong ka BJP, u Bah Sanbor Shullai.
Hynrei kumba ong hi kiba bun ba ka rai kaba khatduh kadei ha ka 2 tarik u Lber 2023 bad na ka rresult la ithuh mano ban ïasynrop lang bad mano ban long Myntri Rangbah jong ka jylla.
