Shillong, Rymphang 28: Ka jingwanpoi ki nongthep Vote haka election MLA 2023 ha Meghalaya ka la kot shaka 85.25% ha ki 59 tylli ki konstitwensi.Lah ban kdew ba haka 5 baje janmiet jong ka 27 tarik Rymphang naka liang u Chief Electoral Officer (CEO) u bah F.R Kharkongor ula pyntip ba ka jingwan poi ki nongthep Vote ka la poi sha ka 75 % watla ki dang don katto katne ki constituency kiba dang bteng ka jingthep wat haduh ka 10 baje mynmiet ruh.
U bah Kharkongor ula pyntip ba hadien bala lum jingkheiñ mynta ka sngi kata haba la poi lut ki EVM na baroh ki Polling Station, la ïoh jingtip ba ka jingpoi ki nongthep Vote ha ki 59 tylli ki constituency ka la kiew haduh 85.25% naka 75 % kaba la lum tang haduh ka por 5 baje janmiet jong ka 27 tarik Rymphang. Ula bynrap ba ïa ka jingkheiñ ba la kot haduh 85.25% la lum khlem da kynthup lang ïa ki Postal Ballots bad kane ka jingwanpoi ki nongthep Vote kan dang kiew lada ym shah pynsangeh ka jingthep Vote ha Sohiong Constituency.
“Lada ka jingthep Vote ha Sohiong constituency ka ïaid beit, ka jingwan poi ki nongthep Vote ha baroh 60 tylli ki constituency ruh ka lah ban tam 86% namar baroh ki tip ba ka Sohiong kadei ka constituency kaba khring bha ïa ki paidbah shaka jingthep Vote” la ong u bah Kharkongor. Lah ban kdew ba ha election MLA 2018, ka jingpoi ki nongthep Vote ha baroh 60 tyll ki constituency jong ka jylla Meghalaya ka poi haduh 86.9%
